- १ कार्तिक २०८३, आईतवार / Oct 18, 2026
काठमाडौं । बचतकर्ताको रकम हिनामिना प्रकरणमा जिल्ला प्रहरी कार्यालय कास्कीले मंगलबार ८ जनालाई पक्राउ गरेको छ ।
गैरपाटन पोखराकोस्थित प्राइम बहुउद्देयीय सहकारी संस्था लिमिटेडका पूर्व र वर्तमान पदाधिकारी तथा कर्मचारी गरी ८ जनालाई प्रहरीले पक्राउ गरेको हो ।
उनीहरूले १ अर्ब १५ लाख ८ हजार १ सय ४२ रुपैयाँ ५० पैसा रकम अपचलन तथा हिनामिना गरेको सहकारी रजिष्ट्रारको कार्यालय पोखराले जनाएको छ । सहकारी ऐन, २०७४ बमोजिम अनुन्धान गरी दिन अनुरोध गरेको पत्रको आधारमा जिल्ला प्रहरी कार्यालय कास्कीबाट खटिएको प्रहरी पक्राउ गरेको हो ।
पक्राउ पर्नेमा सहकारीका निवर्तमान अध्यक्ष निदेशप्रसाद कोइराला, अध्यक्ष शंकर कार्की, सहकारी व्यवस्थापक निरु थापा केसी, कर्मचारी सुरेन्द्रमणि पौडेल, कानुनी सल्लाहाकार इन्द्रप्रसाद बराल, पूर्वकोषध्यक्ष कुलदिप भट्टराई, कर्जा अधिकृत सुनील थापा र सेयर सदस्य एवं सल्लाहकार मानबहादुर गुरुङ रहेको कास्कीका सूचना अधिकारी बसन्तकुमार शर्माले जानकारी दिए ।
प्रहरीले सहकारीका बचतकर्तालाई उजुरीका लागि सार्वजनिक सूचनामार्फत आह्वान गरेको छ । सहकारी रजिस्ट्रारको कार्यालय गण्डकीले प्राइम सहकारीमा बचतकर्ताको बचत हिनामिना भएको भन्ने पत्राचार प्रहरीलाई गरेको थियो ।
