दैलेखमा पारिवारिक विवादले उग्र रूप लियो : बुबाको कुटपिटबाट छोराको मृत्यु

दैलेख । दैलेखमा पारिवारिक विवादका क्रममा बुबाको कुटपिटबाट छोराको मृत्यु भएको छ। जिल्ला सदरमुकाम नारायण नगरपालिका–९ सालखर्कका ७३ वर्षीय कविराज थापाले आफ्नै ४४ वर्षीय छोरा यादव थापालाई गए राति कुटपिट गरेको प्रहरीले जनाएको छ।

पारिवारिक विवादका क्रममा भएको कुटपिटपछि यादव थापाको गर्धन, पाखुरा लगायत शरीरका विभिन्न भागमा गम्भीर चोट लागेको थियो। घाइते अवस्थामै उनलाई उपचारका लागि दैलेख अस्पताल लैजाँदै गर्दा बाटोमै मृत्यु भएको जिल्ला प्रहरी कार्यालय दैलेखका प्रहरी निरीक्षक पुष्पराज रोकायले जानकारी दिए।

घटनापछि कुटपिटमा संलग्न कविराज थापालाई प्रहरीले नियन्त्रणमा लिएर थप अनुसन्धान अघि बढाएको छ।