- ३१ भाद्र २०८३, बुधबार / Sep 16, 2026
काठमाण्डौ । बितेका आठ महिनामा सरकारले गरेको विकास खर्च निकै कमजोर देखिएको छ । महालेखा नियन्त्रकको तथ्याङ्कानुसार फागुन मसान्तसम्ममा पूँजीगत खर्च वार्षिक विनियोजनको २३ दशमलव ३७ प्रतिशतमात्रै छ ।
सरकारले चालू आर्थिक वर्षका लागि पूँजीगत शीर्षकमा तीन खर्ब ५२ अर्ब ३५ करोड ४० लाख बजेट विनियोजन गरेकोमा अहिलेसम्म ८२ अर्ब ३३ करोड ६० लाख रुपैयाँ बराबरमात्रै खर्च भएको देखिन्छ ।
सरकारले चालू आर्थिक वर्षका लागि १८ खर्ब ६० अर्ब ३० करोड रुपैयाँ बराबरको बजेट ल्याएको थियो । फागुन मसान्तसम्म वार्षिक विनियोजनको ४५ दशमलव १२ प्रतिशत अर्थात् आठ खर्ब ३९ अर्ब ३५ करोड ६० लाख रुपैयाँ बराबर खर्च भएको छ ।
चालू शीर्षकमा ११ खर्ब ४० अर्ब ६६ करोड ४५ लाख विनियोजन भएकोमा ५१ दशमलव २१ प्रतिशत अर्थात् पाँच खर्ब ८४ अर्ब १२ करोड ७८ लाख रुपैयाँ बराबर खर्च भएको छ ।
वित्तीय व्यवस्थापन शीर्षकमा तीन खर्ब ६७ अर्ब २८ करोड ४५ लाख विनियोजन भएकोमा ४७ दशमलव ०७ प्रतिशत अर्थात् एक खर्ब ७२ अर्ब ८९ करोड २२ लाख रुपैयाँ बराबर खर्च भएको छ ।
सरकारको वैदेशिक अनुदान सङ्कलन पनि निकै कमजोर छ । चालू आर्थिक वर्षका लागि ५२ अर्ब ३२ करोड ६५ लाख वैदेशिक अनुदान उठाउने लक्ष्य रहेकोमा अहिलेसम्म वार्षिक लक्ष्यको १७ दशमलव ५१ प्रतिशत अर्थात् नौ अर्ब १६ करोड २५ लाख रुपैयाँ अनुदान लिएको अवस्था छ । रासस
