- ९ असार २०८३, मंगलवार / Jun 23, 2026
काठमाडौं। मेडिकल व्यवसायी दुर्गा प्रसाईंलाई कालोमोसो दल्ने एमाले कार्यकर्ता भएको आरोप छ । एक्लो अवस्थामा भएका बेला आफू माथि कालोमोसो दलेको प्रसाईँले बताएका छन् । सोमबार काठमाडौंमा पत्रकार सम्मेलन आयोजना गरेका प्रसाईंले सम्मेलन सकेर बाहिर निस्किने क्रममा अज्ञात व्यक्तिले उनीमाथि कालोमोसो दलेका थिए ।
प्रसाईले उक्त घटनामा एमालेका कार्यकर्ता संलग्न रहेको आरोप लगाए । आफूले सर्वहारा वर्गको पक्षमा वकालत गर्दा एमालेका कार्यकर्ताले आफूमाथि दुर्व्यवहार गरेको दावी गरे । देशमा देखिएका विभिन्न समस्याका विषयमा राखिएको छलफल कार्यक्रमलाई सम्बोधन गरिसकेपछि गाडी चढ्ने बेलामा पानीले भरेको बोतलबाट एमालेका कार्यकर्ताले आफूमाथि छ्यापेको उनको आरोप छ।
तर दुर्गा प्रसाईंलाई युवाहरुले तह लगाएको एमाले नेता महेश बस्नेतले टिप्पणी गरेका छन् । एमाले पोलिटब्यूरो सदस्य तथा पूर्वमन्त्री बस्नेतले कालोमोसो दलिएका मेडिकल व्यवसायी दुर्गा प्रसाईंलाई युवा संघको तागत ननाप्न चेतावनी दिए । काठमाडौंको जमलमा रहेको होटेल एल्लो पकोडामा आयोजित पत्रकार सम्मेलन समापन गरेर निस्किने क्रममा प्रसाईंमाथि कालो मोसो दलिएको हो ।
एमाले अध्यक्ष केपी शर्मा ओली र महेश बस्नेतको नाम लिएर प्रसाईंले पैचों तिर्ने चेतावनी दिएका थिए । त्यसको जवाफमा महेश बस्नेतले प्रसाईंलाई युवाहरुले आज तह लगाएको प्रतिक्रिया दिएका छन् ।
