- २८ भाद्र २०८३, आईतवार / Sep 13, 2026
काठमाडौँ । शुक्रवार राति जाजरकोट जिल्लाको रामीडाँडा केन्द्रविन्दु बनाई गएको भूकम्पमा परेकाहरुको खोज तथा उद्धारको लागि जाजरकोट र पश्चिम रुकुममा ३ सय ६७ जना सशस्त्र प्रहरी कर्मचारीहरु परिचालन भएको छन् । भूकम्पमा परी १०ः३० बजेसम्ममा जाजरकोटमा ९५ र पश्चिम रुकुममा ३८ जना गरी १ सय ३३ जनाको मृत्यु भएको छ भने १ सय ५५ जनाको उद्धार गरिएको छ ।
भूकम्पमा परेकाहरुको खोज तथा उद्धारको लागि जाजरकोटमा सशस्त्र प्रहरी बल नेपाल नंं. ६ महेश्वरी बाहिनी मुख्यालय सुर्खेतबाट प्रा. सशस्त्र प्रहरीनिरीक्षक डा.निश्चल घिमिरेको कमाण्डमा ४ जना मेडिकल टोली, नं. ३२ गण सुर्खेतबाट सशस्त्र प्रहरी निरीक्षकको कमाण्डमा ७० जना खटिएको छ । त्यसैगरी सशस्त्र प्रहरी बलको नं. ४२ रिजर्भ गण बाँकेबाट सशस्त्र प्रहरी निरीक्षकको कमाण्डमा २२ जना विपद् व्यवस्थापन तालिम प्राप्त टोलीसहित २५ जना, आश्रित गुल्म जाजरकोटबाट ७० जना र आश्रित गुल्म दैलेखबाट २५ जना गरी जम्मा १ सय ९४ जना सशस्त्र प्रहरी कर्मचारीहरु आवश्यक उद्धार सामाग्रीसहित खटिएको छ ।
त्यसैगरी पश्चिम रुकुममा नेपाल एपीएफ अस्पतालबाट प्रा. सशस्त्र प्रहरी नायव उपरीक्षक डा. रोशन पराजुलीको कमाण्डमा ९ जना, नं. २९ ज्वालामाई गणदाङ्गबाट सशस्त्र प्रहरी निरीक्षकको कमाण्डमा २१ जना, नं. ४७ गुल्म पश्चिम रुकुमबाट १ सय ७ जना, आश्रित गुल्म पूर्वी रुकुमबाट २ जना विपद् व्यवस्थापन तालिम प्राप्त टोलीसहित ११ जना, आश्रित गुल्म सल्यानबाट २५ जना गरी जम्मा १ सय ७३ जना सशस्त्र प्रहरी कर्मचारीहरु परिचालन भएका छन् ।
सशस्त्र प्रहरी बल नेपालले प्रभावित क्षेत्रहरुमा विपद् उद्धारका दक्ष जनशक्ति समेत परिचालन गरेको सशस्त्र प्रहरी बलले बताएको छ ।
