- २२ भाद्र २०८३, सोमबार / Sep 7, 2026
काठमाण्डौ । जाजरकोटका जनताले पालमा रात विताएको एक महिना पुगेको छ । कात्तिक १७ गते राति रामीडाँडा केन्द्रबिन्दु बनाएर ६ दशमलव ४ रेक्टरको भूकम्पबाट २६ हजारभन्दा धेरै घर पूर्ण रुपमा भत्किएपछि त्यहाँका जनता पाल मुनी बास बस्न बाध्य भएका हुन । जाजरकोट केन्द्रबिन्दु भएर भूकम्प गएको एक महिना भएपनि भूकम्पमा जोगिएकाहरुलाई चिसोले सताउन लागेको छ ।
३५ हजारभन्दा बढी घरमा आंशिक क्षति पुगेको छ । भूकम्प लगत्तै खोज तथा उद्धारको काममा तदारुकता देखाएको सरकारले राहत र पुनः स्थापनामा त्यति प्रभावकारी काम गर्न नसकेको स्थानीयको भनाई छ । झाडापखाला, ज्वरो र रुघाखोकीका बिरामी बढेका छन् ।
मुटु रोगी, दम, रक्तचाप र मधुमेहका बिरामीको अवस्था कमजोर बन्दै गएको छ । जाजरकोटमा १९ र रुकुम पश्चिममा ३ गरी २२ जनाले चिसोबाट ज्यान गुमाएका छन् । ज्यान गुमाउनेमा धेरैजसो दीर्घरोगी छन् । भूकम्पबाट घरमा क्षति भएपछि खुला चौरमा बसेकाहरु थप समस्यामा परेका छन् । यसबाट सबैभन्दा धेरै जोखिममा सुत्केरी, गर्भवती, ज्येष्ठ नागरिक र बालबालिका परेका छन् । जाजरकोट भूकम्पले जाजरकोट र रुकुम पश्चिममा धेरै क्षति गर्यो ।
भूकम्प पीडितको लागि सरकार र विभिन्न राजनीतिक दलहरु एक भएर तत्काल अस्थायी आवास र त्यससँगै स्थायी पुनर्निर्माणमा जुट्नुपर्ने स्थानीयको माग छ । वृद्धवृद्धा, शिशु र दीर्घरोगी बढी समस्यामा परेको र भूकम्पमा परेर एक सय ५४ जनाले ज्यान गुमाएको जिल्ला प्रशासन कार्यालय जाजरकोटले जनाएको छ ।
