- ५ असार २०८३, शुक्रबार / Jun 19, 2026
एजेन्सी, २४ कार्तिक । जापानको उत्तरपूर्वी कुजि क्षेत्रमा हिजो साँझ ६.९ म्याग्निच्युडको शक्तिशाली भूकम्प गएको छ। जापानको मौसम विभागका अनुसार भूकम्प समुद्र सतहदेखि करिब १६ किलोमिटर गहिराइमा गएको हो।
प्रारम्भिक मापन अनुसार केही तटीय क्षेत्रमा १० देखि २० सेन्टिमिटरसम्मका स–साना सुनामीका लहरहरू देखिएका थिए, तर अहिलेसम्म ठूलो क्षति वा बाढीको विवरण आएको छैन, यूरोन्यूजले जनाएको छ।
अहिलेसम्म मानवीय वा भौतिक क्षतिको औपचारिक विवरण आएको छैन। भूकम्प गएको क्षेत्र नजिकै रहेका दुईवटा परमाणु ऊर्जा संयन्त्र सुरक्षित रहेका र कुनै क्षति नभएको बताइएको छ।
भूकम्पका कारण केही क्षेत्रमा विद्युत् आपूर्ति अवरुद्ध भएको छ भने टोहोको शिंकान्सेन बुलेट रेल सेवा अस्थायी रूपमा रोकिएको जनाइएको छ। सुरक्षाका लागि उद्धार टोली र स्थानीय प्रशासनलाई सतर्क रहन र सम्भावित परकम्पका लागि तयारी अवस्थामा रहन निर्देशन दिइएको छ।
जापानकी प्रधानमन्त्री साने ताकाइचीले सामाजिक सञ्जालमार्फत नागरिकलाई तटीय क्षेत्रबाट टाढा रहन र सतर्कता अपनाउन आग्रह गरेकी छन्। मौसम विभागले आउँदो केही दिनसम्म परकम्पहरू आउन सक्ने चेतावनी पनि दिएको छ।
