गोरखा, बागलुङ र धादिङका बाढीपहिरो प्रभावित क्षेत्र तीन महिनाका लागि सङ्कटग्रस्त घोषित

काठमाडौँ, ३० असाेज । सरकारले बाढीपहिरोबाट प्रभावित गोरखा, बागलुङ र धादिङका विभिन्न स्थानीय तहलाई तीन महिनाका लागि विपद् सङ्कटग्रस्त क्षेत्र घोषणा गरेको छ ।

शुक्रबार बसेको मन्त्रिपरिषद् बैठकले गोरखाका तीन गाउँपालिका, बागलुङका दुई नगरपालिका र धादिङको एक गाउँपालिकाका दुई वडालाई विपद् सङ्कटग्रस्त क्षेत्र घोषणा गर्ने निर्णय गरेको हो । निर्णयअनुसार गोरखाको चुमनुब्री, धार्चे र आरुघाट गाउँपालिकालाई सङ्कटग्रस्त क्षेत्र घोषणा गरिएको छ ।

त्यस्तै, धादिङको त्रिपुरासुन्दरी गाउँपालिकाका वडा नम्बर १ र २ तथा बागलुङको गलकोट र ढोरपाटन नगरपालिकालाई पनि उक्त सूचीमा समेटिएको छ । मन्त्रिपरिषद्को निर्णयमा बुढीगण्डकी नदीमा आएको बाढीबाट गोरखाका चुमनुब्री, धार्चे र आरुघाट गाउँपालिका तथा धादिङको त्रिपुरासुन्दरी गाउँपालिकाका वडा नम्बर १ र २ अति प्रभावित भएको उल्लेख छ ।

यसैगरी, २०८३ असोज ८ देखि ११ गतेसम्म भएको वर्षाका कारण आएको बाढीपहिरोबाट बागलुङका गलकोट र ढोरपाटन नगरपालिका प्रभावित भएका थिए । यी क्षेत्रलाई तीन महिनाका लागि विपद् सङ्कटग्रस्त घोषणा गर्ने निर्णय सरकारले गरेको हो ।