- १९ कार्तिक २०८३, बिहीबार / Nov 5, 2026
काठमाडौँ, ३० असाेज । सरकारले आर्थिक वर्ष २०८३/८४ का लागि गहुँको न्यूनतम समर्थन मूल्य प्रतिक्विन्टल ४ हजार १०७ रुपैयाँ निर्धारण गरेको छ । शुक्रबार बसेको मन्त्रिपरिषद् बैठकले गहुँ बालीको न्यूनतम समर्थन मूल्य तोक्ने निर्णय गरेको हो ।
सरकारले किसानलाई उत्पादनमा प्रोत्साहन गर्न र कृषि उपजको उचित मूल्य सुनिश्चित गर्ने उद्देश्यले समर्थन मूल्य निर्धारण गरेको जनाएको छ । कृषि विभागले गहुँको न्यूनतम समर्थन मूल्य निर्धारण गर्न देशभरका सातै प्रदेशमा प्राविधिक टोली खटाएको थियो ।
टोलीले गहुँ उत्पादनमा लाग्ने लागत, बिउ, मल, श्रम, मुद्रास्फीति तथा बजार मूल्यको अध्ययन र विश्लेषण गरेको थियो । सोही अध्ययनका आधारमा उत्पादन लागतलाई ध्यानमा राखेर मूल्य निर्धारण गरिएको विभागले जनाएको छ । गत आर्थिक वर्ष २०८२/८३ मा गहुँको न्यूनतम समर्थन मूल्य प्रतिक्विन्टल ३ हजार ९४५ रुपैयाँ तोकिएको थियो । यस वर्षको मूल्य गत वर्षको तुलनामा १६२ रुपैयाँले बढी हो ।
त्यस्तै, आर्थिक वर्ष २०८१/८२ मा गहुँको न्यूनतम समर्थन मूल्य प्रतिक्विन्टल ३ हजार ८६७ रुपैयाँ र आर्थिक वर्ष २०७९/८० मा ३ हजार ३५१ रुपैयाँ निर्धारण गरिएको थियो ।
सरकारले हरेक वर्ष बाली लगाउनुअघि नै न्यूनतम समर्थन मूल्य निर्धारण गर्दै आएको छ । यसले किसानलाई उत्पादनको उचित मूल्य प्राप्त गर्ने अपेक्षा बढाए पनि त्यसको प्रभावकारी कार्यान्वयन महत्त्वपूर्ण मानिन्छ ।
