- १५ आश्विन २०८३, बिहीबार / Oct 1, 2026
मुख्य बुँदा
बाढी र पहिरोका कारण देशका विभिन्न मुख्य राजमार्ग अवरुद्ध।
धादिङको गजुरीमा पृथ्वी लोकमार्ग पूर्ण रूपमा बन्द।
सिन्धुपाल्चोकमा अरनिको राजमार्ग पूर्ण रूपमा अवरुद्ध।
इलाममा मेची राजमार्ग बन्द, वैकल्पिक बाटोबाट यातायात सञ्चालन।
म्याग्दीमा बेनी–जोमसोम सडकखण्ड पूर्ण रूपमा अवरुद्ध।
प्युठानमा भिंगृ–स्वर्गद्वारी सडक बन्द।
जाजरकोट–डोल्पा सडक दुई ठाउँमा अवरुद्ध।
सल्यानमा राप्ती राजमार्ग पूर्ण रूपमा बन्द।
बीपी राजमार्ग र कान्ति लोकपथमा रात्रिकालीन सवारीमा रोक।
लगातार वर्षाका कारण अवरुद्ध सडक खुलाउन समस्या।
काठमाडौं, १ भदौ । अविरल वर्षासँगै आएको बाढी र पहिरोका कारण देशका विभिन्न मुख्य राजमार्ग तथा सडकखण्डमा यातायात प्रभावित भएको छ। नेपाल प्रहरीले सोमबार बिहान ६ः३० बजेसम्मको विवरण सार्वजनिक गर्दै कोशी, बागमती, गण्डकी, लुम्बिनी र कर्णाली प्रदेशका दर्जनौँ सडकखण्ड अवरुद्ध रहेको जनाएको छ।
लगातारको वर्षाका कारण यात्रुहरूलाई गन्तव्यमा पुग्न कठिन भएको छ भने कतिपय सडकमा वैकल्पिक मार्गबाट यातायात सञ्चालन गरिएको छ।
पृथ्वी लोकमार्ग पूर्ण रूपमा अवरुद्ध
बागमती प्रदेशअन्तर्गत धादिङको गजुरी गाउँपालिका–२ चालिसेमा सोमबार बिहान ५ः४५ बजेदेखि बाढीका कारण पृथ्वी लोकमार्ग पूर्ण रूपमा अवरुद्ध भएको छ। सडक अवरुद्ध भएपछि काठमाडौं आउने–जाने सवारीसाधन प्रभावित भएका छन्।
सम्भावित बाढी तथा पहिरोको जोखिमलाई ध्यानमा राख्दै काभ्रेको खुर्कोट–नेपालथोक–कटुन्जेबेंसी हुँदै चल्ने बीपी राजमार्ग र मकवानपुरको हेटौँडा–ठिङ्गन हुँदै ललितपुर जोडिने कान्ति लोकपथमा रात्रिकालीन सवारी सञ्चालनमा समेत रोक लगाइएको छ।
प्रहरीका अनुसार बीपी राजमार्गमा बेलुका ६ बजेदेखि बिहान ४ बजेसम्म तथा कान्ति लोकपथमा बेलुका ५ बजेदेखि बिहान ५ बजेसम्म अर्को सूचना नभएसम्म सम्पूर्ण सवारीसाधन सञ्चालनमा रोक लगाइएको छ।
अरनिको र त्रिशूली–मैलुङ सडक बन्द
सिन्धुपाल्चोकको भोटेकोशीस्थित कोदारी र लिपिङमा पहिरोका कारण अरनिको राजमार्ग पूर्ण रूपमा बन्द भएको छ। त्यस्तै, रसुवाको उत्तरगया गाउँपालिकास्थित खाल्टेमा बाढीका कारण त्रिशूली–मैलुङ–स्याफ्रुबेंसी सडकखण्ड साउन ८ गतेदेखि नै पूर्ण रूपमा अवरुद्ध छ।
मेची राजमार्ग पनि बन्द
कोशी प्रदेशमा अविरल वर्षाका कारण इलामको राजदुवालीमा मेची राजमार्ग पूर्ण रूपमा अवरुद्ध भएको छ। यद्यपि वैकल्पिक बाटो प्रयोग गरेर यातायात सञ्चालन गर्ने व्यवस्था मिलाइएको प्रहरीले जनाएको छ।
सङ्खुवासभाको भोटखोलास्थित सिरेक डाँडामा पहिरोका कारण खाँदबारी–किमाथाङ्का सडकखण्ड पनि पूर्ण रूपमा बन्द छ। भोजपुरको बोखिममा पहिरो पन्छाएपछि मध्यपहाडी लोकमार्ग भने एकतर्फी रूपमा सञ्चालनमा ल्याइएको छ।
बेनी–जोमसोम सडकमा पहिरो
गण्डकी प्रदेशअन्तर्गत म्याग्दीको अन्नपूर्ण गाउँपालिकास्थित रुप्सेमा पहिरो खस्दा बेनी–जोमसोम सडकखण्ड पूर्ण रूपमा बन्द भएको छ।सोही सडकखण्डको मुस्ताङस्थित कैकु खोलामा भने एकतर्फी रूपमा सवारी सञ्चालन भइरहेको छ।
लमजुङको मर्स्याङ्दीस्थित रामबजारमा पहिरोका कारण बेँसीसहर–मनाङ सडकखण्ड पूर्ण रूपमा अवरुद्ध छ। उक्त सडकमा वैकल्पिक बाटोको व्यवस्था गरिएको छ।बागलुङको कालीगण्डकी करिडोर तथा बागलुङ–बेनी सडकखण्ड पनि पहिरोका कारण एकतर्फी रूपमा मात्रै सञ्चालनमा छन्। दुवैतर्फी यातायात सञ्चालन गर्न थप समय लाग्ने प्रहरीले जनाएको छ।
लुम्बिनी र कर्णालीमा पनि सडक अवरुद्ध
लुम्बिनी प्रदेशको प्युठानस्थित रुमालेमा साउन ३१ गते खसेको पहिरोका कारण भिंगृ–स्वर्गद्वारी सडकखण्ड अझै पूर्ण रूपमा बन्द छ।कर्णाली प्रदेशको रुकुम पश्चिममा बाढी र पहिरोका कारण भेरी करिडोरअन्तर्गत जाजरकोट–डोल्पा सडकखण्ड दुई ठाउँमा अवरुद्ध भएको छ।
आठबीसकोटको रिजेगार्ड खोला र पिपलचौरमा सडक पूर्ण रूपमा बन्द भएको प्रहरीले जनाएको छ।त्यस्तै, सल्यानको कपुरकोटस्थित अरिङ्गालेमा पहिरो खस्दा राप्ती राजमार्ग पनि पूर्ण रूपमा अवरुद्ध रहेको सडक विभाग र प्रहरीको तथ्याङ्कमा उल्लेख छ।
लगातार वर्षाले सडक खुलाउन समस्या
अवरुद्ध सडकहरू खुलाउन सम्बन्धित निकायले पहल गरिरहेका छन्। तर लगातार भइरहेको वर्षाका कारण पहिरो पन्छाउने तथा सडक मर्मतको काममा समेत समस्या भइरहेको छ। प्रहरीले वर्षाका कारण थप पहिरो र बाढीको जोखिम रहेकाले राजमार्गमा यात्रा गर्दा आवश्यक सतर्कता अपनाउन आग्रह गरेको छ।
