नेपालमा पहिलो पटक एक सय ५० देशका विश्वविद्यालयका उपकुलपति तथा शिक्षाविद्कोको सम्मेलन हुँदै

काठमाण्डौ । केयूले नेपालको शैक्षिक इतिहासमा पहिलोपटक तीन दिने सम्मेलन आयोजना गर्न लागेको छ । काभ्रेपलाञ्चोकको धुलिखेलमा रहेको काठमाण्डौ विश्वविद्यालय (केयू)मा विहीबारबाट ‘अन्तर्राष्ट्रिय उपकुलपति सम्मेलन’ शुरु हुनेछ ।

सम्मेलनमा विश्वले उच्च शिक्षाको क्षेत्रमा भोगिरहेको समकालीन मुद्दा, उच्च शिक्षाको अन्तर्राष्ट्रियकरण, अन्तर–विश्वविद्यालय सहकार्य, वैश्विक उच्च शिक्षा नीति आदि विषयमा छलफल हुने जनाएको छ । नेपालको उच्च शिक्षालाई अन्तर्राष्ट्रियकरण गर्ने तथा अन्तर्राष्ट्रियस्तरमा विश्वविद्यालयको सम्बन्ध स्थापित गर्ने उद्देश्यले अन्तर्राष्ट्रिय उपकुलपति सम्मेलनको आयोजना गरेको केयूले जनाएको छ ।

सम्मेलनमा उच्च शिक्षण संस्थामा भूमण्डलीकरणबारे नयाँ खोज–अनुसन्धान, अन्तर्राष्ट्रिय सहयोग तथा अनुभाव आदानप्रदानलाई प्रोत्साहित गर्ने, साझा सञ्जाल निर्माण, उत्तम साझेदारी अभ्यास, तथा पारस्परिक सहयोग आदानप्रदान गर्ने विषयमा केन्द्रित हुने जनाइएको छ ।

भारतीय विश्वविद्यालय सङ्घको आयोजना एवम् काठमाण्डौ विश्वविद्यालयको व्यवस्थापनमा आयोजित सम्मेलनमा नेपाल, भारत, बङ्गलादेश, मलेसिया, थाइल्याण्डलगायत एक सय ५० देशका विश्वविद्यालयका उपकुलपति तथा शिक्षाविद्को उपस्थिति रहने छ ।