- २७ असार २०८३, शनिबार / Jul 11, 2026
एजेन्सी । जापानमा पूर्व रक्षामन्त्री इशिबा जापानको नयाँ प्रधानमन्त्री बन्ने समाचार एजेन्सी रोयटर्सले जनाएको छ । जापानका पूर्वरक्षामन्त्री शिगेरु इशिबा प्रधानमन्त्री बन्ने भएका हुन । सत्तारूढ ‘लिबरल डेमोक्रेटिक पार्टी’ (एलडीपी) को नेता चुनिएसँगै उनी प्रधानमन्त्री बन्ने भएका हुन ।
वर्तमान प्रधानमन्त्री फुमियो किशिदाले पार्टीभित्र भ्रष्टाचारका काण्डको शृङ्खलाबीच अगस्टमा राजीनामा दिने निर्णयको घोषणा गरेका थिए । इशिबा आफ्नै पार्टीको आलोचना र विपक्षमा जाने नेताका रूपमा चिनिन्छन् । उनले नाटो सैन्य गठबन्धनको एशियाली संस्करण र थप समान जापान–अमेरिकी सुरक्षा गठबन्धको प्रस्ताव गरेका छन् ।
उनी ताइवानको लोकतन्त्रको समर्थक पनि रहेका छन् । शुक्रबार भएको दलको नेताको चुनावमा ६७ वर्षीय इशिबाले दुई सय १५ र उहाँका महिला प्रतिस्पर्धी साने ताकाइचीले एक सय ९४ मत प्राप्त गरेका थिए ।
इशिबा दोस्रो चरणको मतदानमा विजयी भएका हुन । संसद्को तल्लो सदनमा सत्तारूढ एलडीपीको पूर्ण नियन्त्रण रहेको र शिगेरु इसिबा प्रधानमन्त्री बन्ने निश्चित भएको खबरमा उल्लेख छ । जापानको लोकतान्त्रिक प्रणालीमा संसद्को तल्लो सदनलाई निकै शक्तिशाली मानिन्छ ।
