- १५ जेष्ठ २०८३, शुक्रबार / May 29, 2026
पेरिस, ९ साउन । फ्रान्सले आगामी सेप्टेम्बरमा प्यालेस्टाइनलाई स्वतन्त्र राष्ट्रको रूपमा आधिकारिक मान्यता दिने घोषणा गरेको छ। राष्ट्रपति इमानुएल म्याक्रोँले एक्स (पूर्व ट्विटर) मा लेख्दै संयुक्त राष्ट्र संघको महासभाको सत्रमा उक्त घोषणा औपचारिक रूपमा गरिने बताएका हुन्।
फ्रान्सको यो निर्णयपछि, फ्रान्स जी–सेभेन समूहमा पर्ने राष्ट्रहरूमध्ये प्यालेस्टाइनलाई मान्यता दिने पहिलो मुलुक बन्नेछ। म्याक्रोँले आफ्नो पोस्टमा भनेका छन्, “आजको प्राथमिक आवश्यकता गाजामा युद्ध अन्त्य गर्नु, बन्धकको रिहाइ गराउनु र मानवीय सहायता पुर्याउनु हो। शान्ति सम्भव छ।”
फ्रान्सको घोषणालाई प्यालेस्टिनी अधिकारीहरूले स्वागत गरेका छन् भने इजरायली प्रधानमन्त्री बेन्जामिन नेतन्याहूले भने हमासको आक्रमणपछि यस्तो निर्णय आतंकवादलाई पुरस्कार दिनु सरह भएको प्रतिक्रिया दिएका छन्। त्यस्तै, अमेरिकी विदेश सचिव मार्को रुबियोले यो निर्णयलाई “कडा रूपमा अस्वीकार्य” भन्दै आपत्ति जनाएका छन्।
म्याक्रोँले स्पष्ट पारेका छन् कि फ्रान्सको उद्देश्य गाजाको पुनर्निर्माण, हमासको निशस्त्रीकरण, र प्यालेस्टाइन राज्यको व्यवहार्यता सुनिश्चित गर्दै इजरायललाई मान्यता दिने सशक्त राष्ट्रको निर्माण गर्नु हो। उनले प्यालेस्टिनी राष्ट्रपति महमूद अब्बासलाई पत्र लेख्दै यो निर्णयको औपचारिक जानकारीसमेत दिएका छन्।
