- १ जेष्ठ २०८३, शुक्रबार / May 15, 2026
काठमाण्डौ, २४ साउन । संयुक्त राष्ट्रसङ्घको मानवीय समन्वय कार्यालय (OCHA) ले गाजामा राहत सामग्रीको पहुँच अत्यन्त सीमित भएकाले बालबालिकासहित नागरिकहरू गम्भीर भोकमरी र कुपोषणको सङ्कटमा परेको चेतावनी दिएको छ।
मानवीय संस्थाहरूका अनुसार गाजाका बालबालिकामा तीव्र कुपोषणको दर अहिलेसम्मकै उच्च विन्दुमा पुगेको छ। साझेदार संस्थाहरूले अत्यावश्यक पोषण सामग्री गाजामा पुग्न नसक्दा स्थिति झन् जटिल बन्दै गएको बताएका छन्।
विश्व स्वास्थ्य सङ्गठन (WHO) का महानिर्देशक टेड्रोस अधानोम गेब्रेयससले आधारभूत सेवामा पहुँच सीमित हुँदा कुपोषण र भोकमरीसँग सम्बन्धित मृत्युका घटना बढिरहेको जानकारी दिनुभएको छ।
अघिल्लो महिना जुलाईमा मात्र पाँच वर्षमुनिका झन्डै १२ हजार बालबालिका गाजामा तीव्र कुपोषणबाट पीडित भएको तथ्याङ्क सार्वजनिक भएको थियो। इजरायल र हमासबीचको चलिरहेको संघर्षका बीच यो मानवीय सङ्कट झन् चर्कँदै गएको हो।
