- ३० आश्विन २०८३, शुक्रबार / Oct 16, 2026
परासी । नवलपरासीमा अज्ञात व्यक्तिको गोली प्रहारबाट एक सुनचाँदी व्यवसायी घाइते भएका छन् । सुस्ता गाउँपालिका–१ बरुवामा न्यू धौलागिरी सुनचाँदी पसल सञ्चालन गर्दै आएका ६५ वर्षीय गजेन्द्र विश्कर्मामाथि गोली प्रहार भएको हो ।
पसल बन्द गरेर बर्दघाट नगरपालिका–४ देविनगरमा रहेको घरमा स्कुटीबाट फर्कंदै गर्दा उनीमाथि चोर गोला पुल नजिक गएराति गोली प्रहार भएको डिएसपी रमेश बोहराले बताए । गोली लागेर ढलेपछि उनी चढेको लु ४८ प ७४३५ नम्बरको स्कुटी घटनास्थलमा नदेखिएको प्रहरीले जनाएको छ ।
सुनचाँदी राखेर ल्याएको आशंकामा गोली प्रहार गर्ने व्यक्तिले नै स्कुटी लगेको हुन सक्ने प्रहरीले आशंका छ । पाखुरामा गोली लागेका उनलाई तत्काल उपचारका लागि चिसापानी अस्पतालमा लगिएको थियो ।
अहिले उनको भैरहवा मेडिकल कलेजमा उपचार भइरहेको छ । अवस्था खतरामुक्त रहेको डिएसपी बोहराले जानकारी दिए । गोली प्रहार गर्ने व्यक्तिको खोजी कार्य भइरहेको प्रहरीले जनाएको छ ।
