- १९ कार्तिक २०८३, बिहीबार / Nov 5, 2026
झापा । रोजगारीका लागि मलेसिया पुगेर बेपत्ता भएका मेचीनगर नगरपालिका–६ का ३७ वर्षीय गोपाल घिमिरे ८ वर्षपछि घर आइपुगेका छन् ।
अठार वर्षअघि मलेसिया गएका घिमिरेलाई मलेसियाको नेपाली जनसम्पर्क समितिले खोज तथा उद्धार गरी नेपाल पठाएको हो । आमा सानी घिमिरेले खोजीका लागि सार्वजनिक अपिल गरेपछि गोपालको खोजी भएको थियो ।
क्लालाम्पुरबाट काठमाडौँ आएका गोपाल शनिबार घर पुगेको नेपाली कांग्रेसका महामन्त्री विश्वप्रकाश शर्माले बताए । मलेसियामा खोज्न र उद्धार गरेर नेपालसम्म ल्याउन पहल भएकाे थियाे ।
आमा सानीको कारुणिक अपिलपछि मलेसियामा रहेको नेपाली जनसम्पर्क समितिको सक्रियता र नेपाली राजदूतावासको सहयोगमा गोपालको सकुशल उद्धार सम्भव भएको हाे ।
गैरकानुनीरूपमा मलेसियामा रहेका गोपाललाई स्वदेश फर्काउन हवाई टिकट र जरिवाना गरेर नेपाली रु एक लाख चार हजार एक सय ६० तिर्नुपरेको चोलाराज पङ्गेनीले बताए ।
विसं २०६१ चैत ८ गते प्रोडक्सन अपरेटर कामका लागि श्रम अनुमतिपत्र पाएर १९ वर्षका उमेरमा गोपाल मलेसिया गएका थिए । घर फर्किँदा उनी ३७ वर्षको भइसके ।
मलेसिया पुगेको एक सातापछि उनमाथि गैरकानुनी कामदार भएको आरोप लागेको थियो । यसपछि उनको वास्तविक अवस्थाबारे नेपालमा रहेको परिवार बेखबर थियो ।
विदेशमा हराएको छोरा फर्केर घर आएकामा घिमिरेकी आमा सानीले खुसी व्यक्त गरेकी छिन् । उनले छोरा खोजिदिन पहल गरिदिनुहुने सबैप्रति आभार प्रकट गर्दै अब दुःखजिलो गरेर स्वदेशमै गरिखाने बाटोमा लाग्न छोरालाई आग्रह गरिन् ।
