- २३ असार २०८३, मंगलवार / Jul 7, 2026
रसुवा । माघे संक्रान्तिको अवसरमा हरेक वर्ष गोरु जुधाउने मेला लाग्छ । रसुवा र नुवाकोटको संगम स्थल बेत्रावतीमा यस बर्ष नौ हल गोरु जुधाइने भएको छ ।
माघ १ गतेको मेलामा रसुवाको बेत्रावती र नुवाकोटमा किसानहरुले नौ हल गोरु जुधाउने तयारी पुरा भएको गोसाईकुण्ड युवा क्लबले जनाएको छ ।
नेपाल र तिब्बतबीच ८४९ असोज १७ गते बेत्रावती सन्धि भएको खुसियालीमा गोरु जुधाइले ग्रामीण पर्यटन प्रवर्द्धन गर्न सहयोग पुग्ने गरेको छ । बेत्रावतीमा गोसाइँकुण्ड युवा क्लबले ०५३ सालदेखि व्यवस्थित रुपमा गोरु जुधाउने मेला सञ्चालन गर्न थालेका हुन ।
१८८७ सालदेखि नुवाकोटको तारुकामा सुरु भएको गोरु जुधाइलार्ई ०६२ सालदेखि स्थानीय युवाहरुले संस्कृतिको संरक्षण तथा पर्यटनको प्रवर्द्धनमा केन्द्रित रहेर व्यवस्थित रुपमा आयोजना गर्न थालेको माघे संक्रान्ति गोरु जुधाइ संरक्षण संस्थाले बताएको छ ।
बझांगी राजा जयपृथ्वीबहादुर सिंह मावली गाउँ तारुका आउँदा मनोरञ्जन दिन गोरु जुधाइएको सम्झनामा त्यहाँ मेला आयोजना हुने गरेको हो । माघ १ को गोरु जुधाइ हेर्न रसुवा, नुवाकोट, धादिङ, सिन्धुपाल्चोक, काठमाडौं उपत्यका लगायतबाट मानिसहरु बेत्रावती र शेराबगर, तारुका तथा पन्चकन्याको पीपलडाँडा आउने गर्दछन् ।
