बागमती प्रदेशको स्वास्थ्यमन्त्रीमा भक्तपुरका किरण थापा

भक्तपुर । संघिय संसदका दुई प्रमुख पार्टी नेपाली कांग्रेस र नेकपा एमालेको गठबन्दन सरकार बनेसंगै प्रदेशहरुमा पनि सरकारहरु परिवर्तन भएका छन् । मंगलबार बागमती प्रदेशमा पनि सरकार परिवर्तन भएको छ । नेपाली कांग्रेसका बहादुर सिंह लामाको नेतृत्वमा एमाले सम्मिलित नयाँ सरकार बनेको हो । बागमती प्रदेश सरकारमा भक्तपुरबाट प्रतिनिधित्व गर्ने साँसद किरण थापा स्वास्थ्य मन्त्री नियुक्त भएका छन् ।

भक्तपुरको सूर्यविनायक नगरपालिका वडा नं ८ का स्थायी बासिन्दा थापा नेकपा एमालेको जिल्ला कमिटी भक्तपुरका उपाध्यक्ष हुन् । थापा सूर्यविनायक नगरपालिका वडा नं. ८ निवासी भैरव बहादुर थापामगर र ललिता थापामगरका सुपुत्र हुन् । मन्त्री थापाको जन्म बिक्रम संवद २०३३ साल भाद्र १४ गते भएको थियो ।

लामो समय देखि राजनीतिमा सक्रिय थापा विगत ३ दशकदेखि सफल राजनितिक जीवन जिइरहेका छन् । यस अघि उनले सूर्यविनायक नगरपालिका वडा नम्बर ८ को वडा अध्यक्षको जिम्मेवारी सफलतापूर्वक वहन गरिसकेका छन् । राजनीतिक यात्राः २०५३ मा २० बर्षको उमेरमा राष्ट्रिय प्रजातन्त्र पार्टी, गाउँ कमिटी अध्यक्ष हुँदै राजनीतिक यात्रा अघी बढाएका थापा वि.सं २०७१ पुषबाट नेकपा (एमाले)को सक्रिय राजनीति गर्दै आएका छन् ।

वडा अध्यक्ष सफल कार्यकाल लोभलाग्दो तरिकाले विताएका थापाले सामाजिक क्षेत्रमा समेत सेवा गरेका छन् । थापाले राजनीती संगै सामाजिक संघसंस्थाहरुमा नेतृत्वदायी भुमिका निभाउदै आएका छन् । नेपाल रेडक्रस सोसाइटी, केदारनाथको शिर डोलेश्वर महादेव संरक्षण तथा विकास समिति, खानेपानी समिति, नेपाल टाइगर डो संघ (खेलकुद क्षेत्र) लगायतमा उनको नेतृत्वदायी भुमिका रहेको छ ।

उनले हाल सूर्यविनायक उद्योग वाणिज्य संघमा समेत महत्वपूर्ण भूमिका निर्वाह गरिरहेका छन् । सिपाडोलको सरस्वती विद्या गृहबाट विद्यालय तथा उच्च शिक्षाको अध्ययन पूरा गरेका थापा विद्यालय तह बाटै सामाजिक क्षेत्रमा सक्रिय छन् । सुरुमा कुखुरापालन व्यवसायबाट आफ्नो व्यावसायिक यात्रा सुरु गरेका थापाले कुखुरापालन सँगै दाना उद्योग समेत सञ्चालन गरेका थिए । यो संगै मन्त्री थापाले अन्य व्यवसायहरुमा समेत आफ्नो व्यावसायिक छावि निर्माण गर्दै राजनीतिमा जस्तै व्यवसायमा पनि सपल व्यवसायी हुन ।

२०७२ सालको भुकम्पबाट प्रभावित भक्तपुरवासीहरूका निम्ति उनले राहात वितरणमा प्रभावकारी काम गरेका थिए । नेपाल रेडक्रस सोसाईटीको जिल्ला उपसभापतिको रुपमा जनताको घरदैलामा पुगेर त्रिपाल लगायतका अत्यावस्यक राहात सामाग्रीहरू उपलब्ध गराई भुकम्प पिडितलाई हौसला प्रदान गरेका थिए ।

आफू वडा अध्यक्ष हुँदा विश्व महामारी समयमा सुर्यविनायक ८ मा अक्सिप्लान्ट प्लाण्ट, आई.सी.य, एच.डि.यु. सहितको सुविधा सम्पन्न सूर्यविनायक नगर अस्पतालको स्थापना गर्न र अस्पतालको स्तरबृद्धिमा समेत मन्त्री थापाको महत्वपूर्ण हात रहेको छ । जनतालाई समस्या पर्दा आफ्नो ज्यानको प्रवाह नगरि जनताको समस्या समाधान गर्न तल्लिन रहने मन्त्री थापाबाट स्वास्थ्यमन्त्रीमा नियुक्त भएपछि स्वास्थ्य क्षेत्रले समेत परिवर्तन अनुभूति गर्ने आम धारण रहेको छ ।