- २८ भाद्र २०८३, आईतवार / Sep 13, 2026
काठमाडौँ, ६ भदाै । लामो समयदेखि बन्द रहेको हेटौँडा कपडा उद्योग पुनः सञ्चालन गर्न सरकारले लगानी गर्ने भएको छ। उद्योग, वाणिज्य तथा आपूर्तिमन्त्री गौरीकुमारी यादवले उद्योगको स्थलगत निरीक्षण गर्दै आवश्यक लगानी र सञ्चालनको मोडालिटीबारे छलफल भइरहेको बताउनुभएको हो।
निरीक्षणका क्रममा मन्त्री यादवले नेपाली सेना तथा सम्बन्धित सरोकारवालासँग उद्योगको पूर्वाधार, वर्तमान अवस्था र रोजगारी सिर्जनाका विषयमा जानकारी लिनुभएको थियो। साढे दुई दशकदेखि बन्द रहेको उद्योगलाई सरकारले नेपाली सेनाको जिम्मामा मर्मतसम्भार गराइरहेको छ।
गएको साउन २३ गतेदेखि उद्योगका दुईवटा तान सञ्चालनमा ल्याएर परीक्षण उत्पादनसमेत सुरु गरिएको छ। उद्योगका ४ सय ८८ मेसिनमध्ये हाल १२ वटा मात्रै सञ्चालनयोग्य अवस्थामा रहेको जानकारी निरीक्षणका क्रममा दिइएको थियो।
चीन सरकारको सहयोगमा २०३२ सालमा स्थापना भएको हेटौँडा कपडा उद्योग राजनीतिक हस्तक्षेप र कमजोर व्यवस्थापनका कारण २०५७ सालदेखि पूर्ण रूपमा बन्द भएको थियो।
सरकारले उद्योग पुनः सञ्चालनको तयारी अघि बढाएसँगै लामो समयदेखि बन्द रहेको ऐतिहासिक उद्योगले पुनर्जीवन पाउने र रोजगारीका अवसर सिर्जना हुने अपेक्षा गरिएको छ।
