- ६ भाद्र २०८३, शनिबार / Aug 22, 2026
काठमाडौँ, ६ भदाै । चालु वर्षको चार महिनामा देशभर पाँच हजारभन्दा बढी विपद्जन्य घटना भएका छन्। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार वैशाख १ गतेदेखि भदौ ५ गतेसम्म मात्रै देशभर ५ हजार १४ वटा विपद्का घटना भएका हुन्।
यी घटनामा २५० जनाको मृत्यु, आठ जना बेपत्ता र एक हजार ६०७ जना घाइते भएका छन्। विपद्का कारण देशभर ६ हजार २७२ परिवार प्रभावित भएका छन्।प्राधिकरणको तथ्याङ्कअनुसार सबैभन्दा धेरै आगलागीका १ हजार १३६ घटना भएका छन्। त्यसपछि पहिरोका १ हजार ११ र सर्पदंशका १ हजार १० घटना भएका छन्।
त्यस्तै, चार महिनाको अवधिमा हावाहुरीका ४८० र चट्याङका २४५ घटना भएका छन्। बाढी, हिमपहिरो, जनावरको आक्रमणलगायत अन्य विभिन्न प्रकारका विपद्का घटनासमेत भएको प्राधिकरणले जनाएको छ।
