- ७ बैशाख २०८३, सोमबार / Apr 20, 2026
जुम्ला, १३ माघ २०८२ । हिमपातका कारण अवरुद्ध भएको नाग्म–गमगढी सडक पूर्ण रूपमा सञ्चालनमा आएको छ । सडक डिभिजन कार्यालय जुम्लाले डोजर प्रयोग गरी सडकमा जमेको हिउँ हटाएपछि यातायात सुचारु भएको हो ।
बाक्लो हिमपातका कारण सडकमा हिउँ जमेर सवारी साधन चलाउन नसक्ने अवस्था सिर्जना भएको थियो । सडक अवरुद्ध भएपछि सडक डिभिजन कार्यालय जुम्लाले आवश्यक उपकरण र जनशक्ति परिचालन गरी हिउँ पन्छाउने काम तीव्र रूपमा अघि बढाएको थियो ।माघ ११ गतेदेखि सडक आंशिक रूपमा सञ्चालनमा आएको भए पनि सडकमा बाँकी रहेको हिउँ पूर्ण रूपमा हटाएपछि हाल यातायातका साधनहरू सहज रूपमा चल्न थालेका छन् ।
सडक पूर्ण रूपमा खुला भएसँगै बीच बाटोमा अलपत्र परेका यात्रु तथा मालवाहक सवारी साधनहरू आफ्नो गन्तव्यतर्फ लागेको सडक डिभिजन कार्यालय जुम्लाले जनाएको छ । साथै कार्यालयले सडक सञ्चालनमा आए पनि चिसो मौसम र हिउँका कारण सडक चिप्लो हुन सक्ने भन्दै सवारी चालकलाई आवश्यक सावधानी अपनाउन अनुरोध गरेको छ ।
जुम्लामा माघ १० गते रातिदेखि परेको हिमपातका कारण नाग्म–गमगढी सडक अवरुद्ध भएको थियो ।
