- २९ श्रावण २०८३, शुक्रबार / Aug 14, 2026
काठमाडौं, ५ वैशाख । इरानले ‘स्ट्रेट अफ होर्मुज’मा लगाएको अवरोध हटाएसँगै अन्तर्राष्ट्रिय बजारमा कच्चा तेलको मूल्य घट्न थालेको छ ।
युद्धविराम अवधिभर होर्मुज जलमार्गलाई पूर्ण क्षमतामा सञ्चालन गर्न दिने इरानको घोषणापछि विश्व बजारमा इन्धनको मूल्यमा उल्लेखनीय गिरावट आएको हो । अन्तर्राष्ट्रिय सञ्चारमाध्यमका अनुसार ‘ब्रेन्ट क्रुड आयल’को मूल्य प्रति ब्यारेल ९८ अमेरिकी डलरबाट घटेर ८८ डलरमा झरेको छ ।
इरान र अमेरिकाबीच गत अप्रिल ७ को मध्यरातमा १५ दिने युद्धविराम सम्झौता भएको थियो, जुन अप्रिल २२ सम्म कायम रहने बताइएको छ । सोही सहमतिपछि होर्मुज जलमार्ग सञ्चालनमा सहजता आएको हो ।
विश्वको करिब २० प्रतिशत इन्धन आपूर्ति हुने यो जलमार्गमा अवरोध हुँदा तेलको मूल्य आकासिएको थियो । युद्धअघि प्रति ब्यारेल करिब ७० डलर रहेको ‘ब्रेन्ट क्रुड आयल’को मूल्य बढ्दै १०० डलर पार गर्दै अधिकतम ११५ डलरसम्म पुगेको थियो ।
तेलको मूल्य उच्च भएपछि विश्वव्यापी ढुवानी क्षेत्रमा समेत दबाब परेको थियो । केही अन्तर्राष्ट्रिय वायुसेवा कम्पनीहरूले उडान कटौती गर्ने तयारीसमेत गरेका थिए ।
होर्मुज बन्द हुँदा मल आपूर्तिमा समेत असर परेको थियो, किनकि विश्वको करिब एक तिहाइ मल यही मार्गबाट ढुवानी हुने गर्छ ।
यसैबीच, इरानी विदेशमन्त्री अब्बास अरघाचीले जारी गरेको विज्ञप्तिमा अप्रिल २२ सम्म जलमार्गमा कुनै अवरोध नगर्ने उल्लेख गरेका छन् । यद्यपि, इरानले मार्ग खुला गरे पनि अमेरिकाले आफ्नो नाकाबन्दी नीति भने यथावत् राख्ने संकेत दिएको छ ।
