- १७ श्रावण २०८३, आईतवार / Aug 2, 2026
काठमाडौं,५ वैशाख । पेट्रोलियम पदार्थमा भइरहेको निरन्तर मूल्यवृद्धिको विरोध गर्दै उज्यालो नेपाल पार्टीले सरकारको ध्यानाकर्षण गराएको छ ।
पार्टीले जारी गरेको विज्ञप्तिमा प्रधानमन्त्री बालेन शाह नेतृत्वको सरकारले कार्यभार सम्हालेको छोटो समयमै इन्धनको मूल्यमा उल्लेखनीय वृद्धि भएको उल्लेख गर्दै त्यसप्रति असन्तुष्टि जनाएको हो ।
विज्ञप्तिअनुसार गत मार्च २६ मा प्रतिलिटर १८७ रुपैयाँ रहेको पेट्रोलको मूल्य अप्रिल १६ सम्म आइपुग्दा २१९ रुपैयाँ पुगेको छ । त्यस्तै, १६७ रुपैयाँ रहेको डिजेलको मूल्य बढेर २३७ रुपैयाँ पुगेको छ । यसरी छोटो अवधिमै पेट्रोलमा ३२ रुपैयाँ र डिजेलमा ७० रुपैयाँ वृद्धि हुँदा आम उपभोक्ता र समग्र अर्थतन्त्रमा गम्भीर असर परेको पार्टीको ठहर छ ।
पार्टीले नेपाल र भारतबीचको इन्धन मूल्य अन्तरप्रति पनि चिन्ता व्यक्त गरेको छ । भारतीय सीमावर्ती सहर रक्सौलको तुलनामा नेपालमा पेट्रोल ४८ रुपैयाँ र डिजेल ८८ रुपैयाँ महँगो रहेको उल्लेख गर्दै यस्तो असामान्य अन्तरले सीमा क्षेत्रमा चोरीपैठारी तथा अवैध कारोबार बढ्ने जोखिम रहेको बताइएको छ ।
दक्षिण एसियाका अन्य मुलुकहरूले कर समायोजन तथा अनुदानमार्फत नागरिकलाई राहत दिइरहेका बेला नेपाल सरकारले भने मूल्यवृद्धिलाई मात्र प्राथमिकता दिएको आरोप पनि पार्टीले लगाएको छ ।
उज्यालो नेपालको ६ बुँदे माग:
१. पेट्रोलियम पदार्थमा लगाइएका कर तथा भन्सार शुल्कको तत्काल पुनरावलोकन गरी मूल्य घटाइयोस् ।
२. मूल्य स्थिरीकरण कोष परिचालन गरी उपभोक्तालाई राहत प्रदान गरियोस् ।
३. नेपाल–भारत मूल्य अन्तर घटाउन विशेष संयन्त्र गठन गरियोस् ।
४. कालोबजारी, कृत्रिम अभाव र कार्टेलिङ नियन्त्रणका लागि कडा अनुगमन गरियोस् ।
५. विद्युतीय सवारीसाधन र विद्युतीय चुलोमा सहुलियत दिई इन्धन निर्भरता घटाइयोस् ।
६. नेपाल आयल निगमको लागत संरचना र कर प्रणालीमा पूर्ण पारदर्शिता कायम गरियोस् ।
