- १६ जेष्ठ २०८३, शनिबार / May 30, 2026
काठमाण्डौ । भारतको बजेटमा वार्षिक १२ लाख भारुसम्म कमाउनेले आयकर तिर्नु नपर्ने भएपछि नेपालमा पनि बहस सुरु भएको छ । भारतमा यसै हप्ता सार्वजनिक भएको बजेटमा आयकर छुट दिएपछि नेपालमा पनि यसबारे बहस शुरू भएको हो।
भारत सरकारले १२ लाख भारुसम्मको आयमा करमा नलाग्ने र अरु करमा समेत कमी ल्याएपछि नेपालमा पनि करबारे बहस हुन थालेको हो । नेपालमा करका दरहरु निकै धेरै भएको र करको सदुपयोगसमेत नभएको भन्दै विज्ञहरुले अब करका दरमा पुनरावलोकन गर्नुपर्ने बताएका छन् ।
यसअघि सन् २०१४ मा साढे २ लाख, २०१९ मा ५ लाख, २०२३ मा ७ लाख भारुसम्म कमाउनेलाई आयकर छुट थियो । भारत सरकारले यो बजेटमार्फत नागरिकलाई निकै छुट र सुविधा पनि ल्याएको छ । नेपालका करका दर दक्षिण एशियाकै महँगो भएको कर विज्ञहरुको भनाई छ । भारतले औषधिमा समेत कर कम गरेको छ । देशमै उद्योग कलकारखाना बढाउने भनेर कच्चा पदार्थको करमा कटौती गरेको छ ।
नेपालमा सबै प्रकारका करमा व्यापक पुनरावलोकन गर्न आवश्यम रहेकाले भारत एक वर्षमा १२ लाख भारु अर्थात् झण्डै २० लाख नेपाली रुपैयाँ कमाउनेलाई कर तिर्न नपर्ने बनाएको वेला नेपालमा २० लाख रुपैयाँसम्मको करयोग्य आयमा ३० प्रतिशतसम्म कर तिर्नुपर्ने अवस्था रहेको विज्ञहरुको तर्क छ ।
