- १४ भाद्र २०८३, आईतवार / Aug 30, 2026
भारतले नेपालमा सुरुङ उद्धारका लागि प्राविधिक टोली र डीएनए विशेषज्ञ पठाएको छ ।
भारतबाट २३० फिट लामो मोडुलर स्टिल ब्रिजसहित थप बेली ब्रिजका उपकरण ल्याइएको छ ।
चीनले ५० टन आपतकालीन राहत सामग्री र ४ जना सुरुङ उद्धार विशेषज्ञ पठाएको छ ।
जलविद्युत् आयोजनाका सुरुङमा बेपत्ता तथा फसेकाको खोजीमा विदेशी प्राविधिक टोली परिचालन हुने ।
पहिचान खुल्न बाँकी शवको डीएनए परीक्षणमा भारतीय फोरेन्सिक टोलीले सहयोग गर्नेछ ।
काठमाडौं, १४ भदौ । बाढी र पहिरोबाट ठूलो जनधनको क्षति बेहोरिरहेको नेपाललाई छिमेकी मुलुक भारत र चीनले उद्धार तथा राहतमा सहयोग बढाएका छन् । दुवै देशले राहत सामग्रीसँगै विशेष प्राविधिक जनशक्ति र उद्धार उपकरण नेपाल पठाएका हुन् ।
भारतले नेपालमा सुरुङभित्र खोज तथा उद्धारका लागि विशेष प्राविधिक टोली परिचालन गरेको छ । बाढीका कारण विभिन्न जलविद्युत् आयोजनाका सुरुङमा मानिस फसेको तथा बेपत्ता भएको विवरण आएपछि भारतले ‘टनेल टेक्निकल कन्टिन्जेन्ट’ पठाएको हो ।
भारतका विदेशमन्त्री एस. जयशंकरका अनुसार उक्त टोलीसँग सुरुङभित्र खोज तथा उद्धारका लागि आवश्यक विशेष उपकरणसमेत छन् ।त्यस्तै ठूलो संख्यामा फेला परेका शवको पहिचान गर्न भारतले डीएनए विश्लेषण तथा फोरेन्सिक विशेषज्ञको टोली पनि पठाएको छ । बाढीका कारण धेरै शवको पहिचान खुल्न बाँकी रहेकाले डीएनए परीक्षणमार्फत पहिचान गर्न यो टोलीले सहयोग गर्ने अपेक्षा गरिएको छ ।
बाढीका कारण राजमार्गका पुलहरूमा क्षति पुगेपछि आवागमन सहज बनाउन भारतले २३० फिट लामो एकतर्फी मोडुलर स्टिल ब्रिज पनि नेपाल पठाएको छ । उक्त पुल बोकेका १६ वटा ट्रक नेपाल आइपुगेका छन् । यसका अतिरिक्त थप ७ वटा बेली ब्रिज स्थापना गर्न आवश्यक उपकरण पनि नेपाल पठाउने तयारी भइरहेको जनाइएको छ । पुल तथा सडक पूर्वाधारमा पुगेको क्षतिका कारण प्रभावित क्षेत्रमा आवागमन सहज बनाउन यी सामग्री महत्वपूर्ण हुने अपेक्षा गरिएको छ ।
उता चीनले पनि नेपाललाई आपत्कालीन राहत तथा उद्धारमा सहयोग गरेको छ । चिनियाँ वायुसेनाका दुईवटा वाई–२० सैनिक विमानमार्फत ५० टन राहत सामग्री र ४ जना सुरुङ उद्धार विशेषज्ञ नेपाल आइपुगेका छन् । विमानस्थलमा आयोजित कार्यक्रममा नेपालका लागि चिनियाँ राजदूत जाङ माओमिङले राहत सामग्री नेपाल सरकारलाई हस्तान्तरण गरेका थिए । नेपाल सरकारका तर्फबाट विज्ञान, प्रविधि तथा नवप्रवर्तन मन्त्री महावीर पुन र संघीय संसद् सदस्य धर्म केसीले राहत सामग्री बुझेका थिए ।
चीनबाट आएका सुरुङ उद्धार विशेषज्ञले जलविद्युत् आयोजनाका सुरुङमा फसेका वा बेपत्ता व्यक्तिको खोज तथा उद्धारमा प्राविधिक सहयोग गर्नेछन् । उनीहरूसँग सुरुङभित्र खोज तथा उद्धारका लागि आवश्यक अत्याधुनिक उपकरणसमेत रहेको बताइएको छ । चिनियाँ राजदूत माओमिङले विपद्को यो कठिन घडीमा चीन नेपालसँगै रहेको बताएका छन् ।
उनले राहत तथा प्राविधिक सहयोगले बाढी प्रभावितको उद्धार र जीवनरक्षामा योगदान पुग्ने विश्वास व्यक्त गरे । नेपाल सरकारले पनि संकटका बेला छिमेकी मुलुकबाट प्राप्त राहत सामग्रीसँगै विशेषज्ञ तथा प्राविधिक सहयोगले खोज, उद्धार र पुनःस्थापनामा थप सहयोग पुग्ने अपेक्षा गरेको छ ।
