- ३० असार २०८३, मंगलवार / Jul 14, 2026
कपिलवस्तु । कपिलवस्तुमा चट्याङ लागेर दुईजनाको मृत्यु भएकोछ।जिल्ला प्रहरी कार्यालयका अनुसार बुद्धभूमि नगरपालिका–१० धनकौली १७ वर्षे राजु ठाकुर र यशोधरा गाउँपालिका–६ भैइसहियाका २२ वर्षे महेश कलवारको मृत्यु भएको हो । खेतमा काम गर्दैगर्दा चट्याङ लागेर बुधबार बिहान उनीहरुको घटनास्थलमै मृत्यु भएको हो।
चट्याङ लागेर दैलेख र कैलालीमा गरी पाँच जना गम्भीर घाइते भएका छन् । कैलालीमा चट्याङ लागेर ३ जना विद्यार्थी गम्भीर घाइते भएका हुन् । विद्यालय जाने क्रममा बिहान पौने ७ बजे जिल्लाको घोडाघोडी नगरपालिका–९ बुदेनी बस्ने ३ बालिकाहरू गम्भीर घाइते भएका हुन् ।
घाइते हुनेमा ९ वर्षीय सरस्वती भुल, ७ वर्षीय पारु कठायत र १० वर्षीय खिमा कठायत रहेका छन् । उनीहरू अध्ययनरत मोहन्याम आधारभूत विद्यालय बुदेनीको गेटमा पुग्ने क्रममा चट्याङ लागेको इलाका प्रहरी कार्यालयले जनाएको छ । गम्भीर घाइते बालिका एक बालिकाका चट्याङ लागेर आन्द्रा बाहिर आएको छ भने, दुई बालिकाको टाउको चोट लागेको छ ।
यता गएराति परेको चट्याङले दैलेखको भैरवी गाउँपालिका–४ नाउलीखोलाका ५५ वर्षीय धीरबहादुर शाही र उनकी बुहारी २६ वर्षीय कुसुम शाही घाइते भएका हुन् । घरमा सुतिरहेको बेला चट्याङ पर्दा उनीहरू घाइते भएका हुन ।
