- २२ भाद्र २०८३, सोमबार / Sep 7, 2026
एजेन्सी । इजरायल र हमासबीच गाजाको युद्धविराम उल्लङ्घन गरेको आरोप–प्रत्यारोप सुरु भएको छ । इजरायली सेनाले हमासका लडाकूहरूले आफ्नो सेनामाथि आक्रमण गरेको दाबी गर्दै जवाफस्वरूप हवाई आक्रमण गरेको जनाएको छ । तर, हमासले भने युद्धविरामको पूर्ण पालना गरिएको दाबी गरेको छ ।
हमासका एक अधिकारीले इजरायलले पुनः आक्रमण सुरू गर्न ‘बहाना’ बनाएको आरोप लगाएका छन् । दुवै पक्षबीच आक्रमणको आरोप–प्रत्यारोप भइरहेका बेला गाजा युद्ध रोक्न नौ दिनअघि गरिएको युद्धविरामलाई दुबै पक्षले पटक–पटक उल्लङ्घन गरेको देखिएको अन्तर्राष्ट्रिय समाचार संस्था एएफपीले स्थानीय सञ्चारमाध्यमलाई उद्धृत गर्दै जनाएको छ ।
यसैबीच, इजरायली प्रधानमन्त्री बेन्जामिन नेतन्याहूले गाजा पट्टीमा रहेका आतङ्कवादी लक्ष्यविरुद्ध कडा कारबाही गर्न सुरक्षाबललाई निर्देशन दिएका छन् ।
अमेरिकी राष्ट्रपति डोनाल्ड ट्रम्पको मध्यस्थतामा गत अक्टोबर १० देखि लागू भएको उक्त युद्धविरामले इजरायल र हमासबीच दुई वर्षभन्दा बढी समयदेखि जारी विनाशकारी युद्धलाई रोक्ने प्रयास गरेको हो । सम्झौता अनुसार बन्धक र कैदीहरूको आदानप्रदान पनि सम्पन्न भएको बताइन्छ ।
