- १५ जेष्ठ २०८३, शुक्रबार / May 29, 2026
काठमाडौँ, ३ असार । इजरायल र इरानबीचको तनाव थप चुलिँदै गएको छ। इजरायली वायुसेनाले इरानको राजधानी तेहरानस्थित विमानस्थलमा रहेका दुईवटा एफ–१४ लडाकु विमान ध्वस्त पारेको दाबी गरेको छ। इजरायली पक्षका अनुसार ती विमानहरू उसमाथि आक्रमण गर्न प्रयोग हुन सक्ने भन्दै लक्ष्यित गरी आक्रमण गरिएको हो।
इजरायली सेनाले सार्वजनिक गरेको भिडिओमा विमानहरूमा आगो लागेको देखिन्छ। इजरायली वायुसेनाले अहिले तेहरानमाथि हवाई नियन्त्रण कायम गरेको दाबी गर्दै नजिकबाट आक्रमण गर्न सक्ने रणनीति अनुसार कारबाही गरिएको उल्लेख गरेको छ।
यसबीच, इरानी राज्य सञ्चारमाध्यमहरूले इजरायलमाथि नयाँ चरणको क्षेप्यास्त्र आक्रमण सुरु भएको जानकारी दिएका छन्। ती सन्देशअनुसार इरानबाट इजरायलतर्फ नयाँ क्षेप्यास्त्र प्रक्षेपण गरिएको छ।
दुवै देशबीचको यो द्वन्द्व झनै जटिल र संवेदनशील बन्दै गएको देखिएको छ। पछिल्लो इजरायली आक्रमणमा इरानको राजधानीमा अवस्थित राष्ट्रिय प्रसारण भवनमा क्षति पुगेको छ। इस्लामिक रिपब्लिक अफ इरान ब्रडकास्टिङको स्टुडियोमा आक्रमण हुँदा पत्रकार मसौमेह आजिमीको मृत्यु भएको इरानी समाचार संस्था फार्सले जनाएको छ। भिडिओ फुटेजमा समाचार पढ्दै गरेकी प्रस्तोता बिचमै रोकिएको देखिएको छ।
इरानको आधिकारिक विवरण अनुसार, इजरायली आक्रमणमा अहिलेसम्म २२४ जनाको मृत्यु भइसकेको छ। इजरायलको प्रधानमन्त्री कार्यालयले भने इरानी जवाफी कारबाहीमा इजरायलमा २४ जनाको मृत्यु भएको जनाएको छ।
यसबीच अमेरिकी सिनेटर बर्नी स्यान्डर्सले इजरायली प्रधानमन्त्री बेन्जामिन नेतन्याहूले इरानमाथि आक्रमण गरेर युद्ध सुरु गरेको आरोप लगाएका छन्। “अमेरिका नेतन्याहूको यो अवैध युद्धमा सैन्य वा आर्थिक रूपमा संलग्न हुनु हुँदैन,” स्यान्डर्सले सामाजिक सञ्जालमा लेखेका छन्।
दुवै देशका नागरिकहरूलाई अहिले नक्कली आपत्कालीन सन्देशहरू मोबाइलमा प्राप्त भइरहेका छन्। इरानमा इराकी नम्बरबाट प्राप्त फोनहरूमा अत्यावश्यक सामग्री संकलन गर्न भनिएको छ भने इजरायलमा इन्धन अभाव र आश्रयस्थल नखोज्न झूटो सूचना फैलाइएको इजरायली साइबर निर्देशनालयले चेतावनी दिएको छ।
यता, अमेरिकी राष्ट्रपति डोनाल्ड ट्रम्पले जी–७ द्वारा प्रस्तावित संयुक्त वक्तव्यमा हस्ताक्षर नगर्ने बताएका छन्। उनले इरानले कुनै हालतमा आणविक हतियार प्राप्त गर्न नपाओस् भन्नेमा आफू अडिग रहेको बताए।
यसैबीच, इजरायली सेनाले तेहरानमा इरानी राज्य टेलिभिजनको कार्यालयमाथि आक्रमण गरेको पुष्टि गरेपछि पत्रकारको सुरक्षाका लागि कार्यरत अन्तर्राष्ट्रिय संस्था कम्युनिटी टु प्रोटेक्ट जर्नालिस्ट्स (CPJ) ले उक्त घटनाको कडा निन्दा गरेको छ।
CPJ की क्षेत्रीय निर्देशक सारा कुदाहले भनिन्, “लाइभ प्रसारण भइरहेका बेला टेलिभिजन च्यानलमाथि आक्रमण गर्नु प्रेस स्वतन्त्रता र पत्रकार सुरक्षामाथिको गम्भीर हमला हो।”
