- २९ भाद्र २०८३, सोमबार / Sep 14, 2026
दैलेख । नेपाल मजदुर किसान पार्टी (नेमकिपा) चामुण्डा बिन्द्रासैनीको तेस्रो नगर सम्मेलन शनिबार (मंसिर ६, २०८२) सम्पन्न भएकाे छ । चामुण्डा विन्द्रासैनी नगरपालिका वडा नं. – ६, जम्बुकाँध बजारमा आयोजित समारोहमा नेमकिपाका केन्द्रीय सचिवालय सदस्य नन्दबहादुर शाहीले सम्मेलनको औपचारिक उद्घाटन गर्नु भएकाे थियाे ।
सांस्कृतिक झाँकी तथा नारासहितको जुलुसपछि भएको सभामा सम्बोधन गर्दै शाहीले “जनतालाई धोका दिनेहरूले एकदिन जनतासँग माफी माग्नुपर्छ ” भन्दै राजनीतिमा लोभ – लालच, जातीयता र क्षेत्रीयताले देशलाई पछि पारेको टिप्पणी समेत गर्नुभयो । कर्णालीका धेरै गाउँ मन्त्रीले भरिए पनि मन्त्री बढ्दैमा विकास नहुने बताउँदै उनले वर्तमान शासक दलहरूको भूमिकालाई कमजोर, अराजक र सिद्धान्तहीन राजनीतिको नमुना भएको टिप्पणी गर्नुभयो ।
कार्यक्रममा नेमकिपा केन्द्रीय सदस्य तथा कर्णाली प्रदेश संयोजक सरोजराज गोसाईंले नेपाललाई अस्थिर बनाउने प्रमुख कारण भारतीय विस्तारवाद र एकाधिकार पुँजी भएको दाबी गर्नुभयो । नेमकिपाले जितेका पालिकाहरूमा पार्टीले इमानदारीका साथ जनमुखी काम गरिरहेको उहाँको भनाइ थियो ।
त्यसैगरी कार्यक्रममा केन्द्रीय सदस्यहरू जग्यबहादुर शाही, बखत थापा, प्रकाश गुरुङ, तुल्सी खड्का र अन्य वक्ताहरूले अवसरवाद, पुँजीवाद, दलाल राजनीति तथा जनतामाथिको अन्यायका कारण देश विकास रोकिएको धारणा राखेका थिए । त्यसैगरी नेमकिपाका वैकल्पिक केन्द्रीय सदस्य विनोद विकले जनजीविका र देशको हितमा प्रगतिशील गीत प्रस्तुत गर्नुभएकाे थियाे ।
त्यसैगरी नेमकिपा दैलेखका संयोजक जगत ओलीले पुँजीवादी शासक दलका कारण जनताले दुःख पाएको बताउनुभयो । कार्यक्रममा देउडा गायक जयबहादुर थापा र गायिका सपना रावलले देउडा गीत तथा नृत्य प्रस्तुत गरेका थिए ।
