झुम्का कारागारमा ५३ वर्षीय कैदी सुधना सरदारको मृत्यु

इनरुवा, २३ कार्तिक । सुनसरीस्थित झुम्का कारागारमा एक कैदीको मृत्यु भएको छ। झुम्का कारागार प्रशासनका अनुसार आइतबार (हिजो) बिहान करिब ५ः३० बजे कारागारको ‘बी’ बन्दीगृहमा ५३ वर्षीय बन्दी सुधना सरदार अचेत अवस्थामा फेला परेका थिए।

अचेत भएपछि तुरुन्तै कारागारका सुरक्षा गार्ड प्रहरी हवलदार सन्तोष श्रेष्ठसहितको टोलीले उनलाई उपचारका लागि जिल्ला अस्पताल इनरुवा पुर्‍याएको थियो। तर, अस्पताल पुग्नेबित्तिकै बिहान ६ः१५ बजे उपचारको क्रममा उनको मृत्यु भएको अस्पतालका स्रोतलाई उद्धृत गर्दै जलेर सुभाष लामिछानेले जानकारी दिएका छन्।

सरदार जिल्ला अदालतको २०८० असोज २ गतेको आदेशमा जिउ मास्ने बेच्ने मुद्दामा सजाय पाएका थिए। कारागार प्रशासनले घटनाको विषयमा आवश्यक अनुसन्धान भइरहेको जनाएको छ।