- ५ असार २०८३, शुक्रबार / Jun 19, 2026
बाँके, २३ कार्तिक । नेपालगञ्जस्थित राँझा विमानस्थलको सुविधायुक्त नयाँ टर्मिनल भवन निर्धारित समयभन्दा दुई महिना अगाडि नै निर्माण सम्पन्न भएको छ।
२०७९ पुसमा काम सुरु गरेको निर्माण कम्पनीले २०८२ पुससम्म सम्पन्न गर्ने सम्झौता पाएको भए पनि दुई महिना अघि नै काम पूरा गरेको राँझा विमानस्थल टर्मिनल भवन आयोजनाका प्रमुख नलविक्रम थापाले जानकारी दिए।
उनका अनुसार अब केही दिनभित्र निर्माण पक्षबाट औपचारिक हस्तान्तरण हुनेछ र त्यसपछि नागरिक उड्डयन प्राधिकरणको विज्ञ टोलीले स्थलगत अनुगमन गर्नेछ। अनुगमनपछि पुरानो भवनका एक्सरे मेसिनलगायत उपकरणहरू नयाँमा सारेर १५ दिनभित्र सेवा सञ्चालन गर्ने तयारी भइरहेको उनले बताए।
थापाका अनुसार, उक्त भवन अन्तर्राष्ट्रिय मापदण्डअनुसार निर्माण गरिएको छ, जसले आन्तरिक र अन्तर्राष्ट्रिय दुवै उडानका लागि सुविधा प्रदान गर्नेछ। नवनिर्मित भवनको कुल लागत रु. २ अर्ब ७४ करोड २० लाख १८ हजार ९९३ (भ्याट बाहेक) रहेको छ। भवन सेमी बेसमेन्टसहित तीन तल्ले छ, जसको बेसमेन्ट कमर्सियल प्रयोजनका लागि निर्माण गरिएको हो। यहाँ २४ वटा पसल सञ्चालनमा आउनेछन्।
५,०७५ वर्ग मिटर क्षेत्रफल ओगटेको भवनभित्र १४ वटा यात्रु जाँच कक्ष, ३ भिआइपी कोठा, १ बालखेल क्षेत्र, साथै भन्सार र क्वारेन्टाइनका लागि छुट्टाछुट्टै कोठा छन्। भविष्यमा अन्तर्राष्ट्रिय उडानको सम्भावनालाई दृष्टिगत गर्दै घरेलु र अन्तर्राष्ट्रिय यात्रुका लागि अलग-अलग प्रस्थान र आगमन ढोका तयार गरिएको छ। भवनले प्रति घण्टा ६२८ यात्रु सम्हाल्न सक्ने क्षमता राख्दछ।
भवन परिसरमा बगैँचा, ५ देखि १४ मिटर फराकिलो सडक, तथा ढल र पानी निकास प्रणाली समेत विकास गरिएको छ। साथै, एटिआर–७२ का ३ र ट्विनअटरका ५ जहाज एकैपटक पार्किङ गर्न मिल्ने एप्रोन पनि तयार गरिएको छ।
