- ७ कार्तिक २०८३, शनिबार / Oct 24, 2026
काबुलको अस्पतालमा हवाई आक्रमणको अफगानिस्तानको दाबी
४०० जनाको मृत्यु र २५० घाइते भएको जानकारी
पाकिस्तानले आरोप अस्वीकार
२ हजार शय्या क्षमताको अस्पतालमा ठूलो क्षति
सीमा क्षेत्रमा बढ्दो तनाव
एजेन्सी, ३ फागुन । अफगानिस्तानको राजधानी काबुलस्थित लागुऔषध प्रयोगकर्ताहरूको उपचार गर्ने एक अस्पतालमा हवाई आक्रमण हुँदा कम्तीमा ४०० जनाको मृत्यु भएको अफगानिस्तानले दाबी गरेको छ। उक्त आक्रमण सोमबार राति भएको जनाइएको छ।
अफगानिस्तानका उपसरकारी प्रवक्ता हमदुल्लाह फितरतका अनुसार स्थानीय समयअनुसार राति करिब ९ बजे अस्पतालमा हवाई आक्रमण भएको हो। आक्रमणबाट करिब २ हजार शय्या क्षमताको अस्पतालको ठूलो भाग नष्ट भएको र हालसम्म ४०० जनाको मृत्यु तथा करिब २५० जना घाइते भएको दाबी गरिएको छ।
यद्यपि, पाकिस्तानले अस्पतालमा आक्रमण गरेको आरोप अस्वीकार गर्दै पूर्वी अफगानिस्तानमा गरिएका आफ्ना कारबाहीमा कुनै पनि गैरसैनिक क्षेत्रलाई लक्षित नगरिएको जनाएको छ।
स्थानीय सञ्चारमाध्यमले सार्वजनिक गरेका भिडियोहरूमा सुरक्षाकर्मीहरूले टर्चलाइटको सहायताले घाइतेहरूको उद्धार गरिरहेको तथा अग्नि नियन्त्रकहरूले भग्नावशेषमा लागेको आगो निभाउने प्रयास गरिरहेको देखिएको छ। उद्धार टोलीहरू आगो नियन्त्रण र शव निकाल्ने कार्यमा खटिएका छन्।
दुई छिमेकी देशबीचको तनाव पछिल्ला वर्षहरूकै सबैभन्दा घातक चरणमा पुगेको जनाइएको छ। उक्त हवाई आक्रमण हुनुअघि साझा सीमा क्षेत्रमा दुवै पक्षबीच गोली हानाहान भएको थियो, जसमा अफगानिस्तानतर्फ चार जनाको मृत्यु भएको अधिकारीहरूले बताएका छन्।
