- ४ आश्विन २०८३, आईतवार / Sep 20, 2026
काठमाडौं । त्रिभुवन विश्वविद्यालयका चार ठाउँमा ताला लगाएको छ । माओवादी केन्द्र, नेकपा एस लगायतका विद्यार्थी संगठनले प्रिन्सिपल कार्यालयसहति ४ ठाउँमा ताला लगाएका हुन् । त्रिवि मैदानको क्रिकेट प्रतियोगिता पार्किङ शुल्कको विषयलाई लिएर विद्यार्थीहरूले गत मंसिर २५ देखि ताल्चा ठोकेका हुन् । जसका कारण क्याम्पस प्रिन्सिपल ध्यानेन्द्र राई कार्यकक्षमा जान पाएका छैनन् ।
ताला लगाउने अखिल क्रान्तिकारी, अनेरास्ववियू, अखिल छैठौं, अखिल समाजवादी, नेपाल समाजवादी विद्यार्थी युनियन रहेका छन् । एनपीएल प्रतियोगिताको पहिलो दिन स्ववियुका पदाधिकारीको संलग्नतामा पार्किङ शुल्क उठाएको आरोप आन्दोलनरत विद्यार्थीको छ । शुल्क उठाउनेगरी स्ववियुलाई पार्किङको व्यवस्थापनको जिम्मेवारी नदिएको बताउँछन् प्रिन्सिपल ध्यानेन्द्र राई ।
यही विषयलाई लिएर विद्यार्थी संगठनले रजिस्ट्रार कार्यालय अन्तर्गतको सामान्य प्रशासन महाशाखा र स्ववियूको कार्यालयमा पनि ताला लगाएका छन् । क्रिकेट प्रतियोगिताको दोस्रो दिन स्ववियु सभापति श्यामराज ओझाले विज्ञप्ति निकालेर पार्कीङ शुल्क निःशुल्क गरिएको बताएका थिए । स्ववियु सचिव सिद्धान्त भट्टसहित १३ सदस्यले विज्ञप्ति नै निकालेर स्ववियुमा आधिकारिक निर्णय नभएको बताए ।
तर ताला लगाउने विद्यार्थी संगठनहरूले प्रतियोगिताको पहिलो दिन पार्किङ शुल्क उठाएकाले सो रकम फिर्ता गर्नुपर्ने र दोषीमाथि छानबिन हुनुपर्ने माग राखेका छन् । माओवादी निकट विद्यार्थी संगठन अखिल क्रान्तिकारीले आइतबार भौतिकशास्त्र विभागमा पनि ताला लगाएको छ ।
विज्ञान विषय अध्ययन गर्ने विद्यार्थीहरुलाई शोधपत्रमा सहभागी नगराई अनुसन्धानात्मक गतिविधिबाट वञ्चित गरेकाले विभागमा ताला लगाएको संगठनका अध्यक्ष दिनेश ऐर बताए । त्रिविका कर्मचारी पनि आन्दोलनमा छन् । कार्यालय समय सुरु भएपछि आ–आफ्नो कार्यालय अगाडि भेला भएर पुस १ देखि ५ गतेसम्म एक घण्टा धर्ना दिए । कार्यरत कार्यालय सहयोगी, सवारी चालक र सम्पूर्ण करारका कर्मचारीलाई स्थायी गर्न गर्नुपर्ने माग कर्मचारीको छ ।
