- २९ श्रावण २०८३, शुक्रबार / Aug 14, 2026
कास्की, २६ फागुन । कास्की कारागारबाट फरार भएका एक कैदीलाई प्रहरीले ६ महिनापछि पोखराबाट पक्राउ गरेको छ । गत भदौमा भएको आन्दोलनको मौका पारेर फरार भएका कैदीलाई मंगलबार नियन्त्रणमा लिएको प्रहरीले जनाएको छ ।
डाँकाचोरी मुद्दामा सजाय भुक्तान गरिरहेका कास्कीको माछापुच्छ्रे गाउँपालिका–४ लाचोक निवासी सूर्यबहादुर घर्ती क्षेत्रीलाई पोखराको पृथ्वीचोकबाट पक्राउ गरिएको हो ।
प्रहरीका अनुसार उनी २०८२ साल भदौ २४ गते कास्की कारागारमा भएको आन्दोलन र अराजकताको समयमा सुरक्षा घेरा तोडेर फरार भएका थिए । त्यसयता उनी लामो समयदेखि फरार रहेका थिए ।
फरार कैदीको खोजीका लागि नेपाल प्रहरी प्रदेश कार्यालय पोखरा र जिल्ला प्रहरी कार्यालय कास्कीले संयुक्त रूपमा विशेष टोली परिचालन गरेको थियो ।
सोही टोलीले प्राप्त सुराकीका आधारमा फागुन २५ गते दिउँसो करिब १२:४५ बजे पोखरा महानगरपालिका–९ पृथ्वीचोक क्षेत्रमा लुकिछिपी बसिरहेको अवस्थामा उनलाई पक्राउ गरेको हो ।
पक्राउ परेका घर्ती क्षेत्रीलाई आवश्यक कानुनी प्रक्रिया पूरा गरी बाँकी कैद सजाय भुक्तानका लागि पुनः कास्की कारागार पठाइएको प्रहरीले जनाएको छ ।
