- ४ जेष्ठ २०८३, सोमबार / May 18, 2026
काठमाडौं, २६ फागुन । प्रतिनिधिसभा निर्वाचनको समानुपातिक निर्वाचन प्रणालीतर्फको मतगणना तीव्र रूपमा जारी रहेको छ । मंगलबार बिहानसम्म देशभर १ करोड ३ लाखभन्दा बढी मत गणना भएको निर्वाचन आयोगले जनाएको छ ।
निर्वाचन आयोगका अनुसार हालसम्म १ करोड ३ लाख १० हजार ३ सय ३० मत गणना भइसकेको छ । सार्वजनिक पछिल्लो मतपरिणामअनुसार राष्ट्रिय स्वतन्त्र पार्टी (रास्वपा) सबैभन्दा बढी मत प्राप्त गर्दै पहिलो स्थानमा रहेको छ । रास्वपाले ४९ लाख ५८ हजार ७८१ मत प्राप्त गरेको छ । यो कुल गणना भएको मतको झण्डै आधा हिस्सा हो ।
यसैगरी नेपाली कांग्रेस १६ लाख ७६ हजार ३१० मतसहित दोस्रो स्थानमा रहेको छ । नेपाल कम्युनिस्ट पार्टी (एमाले) १३ लाख ९१ हजार ६९८ मतसहित तेस्रो स्थानमा रहेको छ । त्यस्तै नेपाली कम्युनिस्ट पार्टीले ७ लाख ५४ हजार ४७३ मत प्राप्त गरेको छ । श्रम संस्कृति पार्टी ३ लाख ४८ हजार १७८ मतसहित पाँचौँ स्थानमा रहेको छ भने राष्ट्रिय प्रजातन्त्र पार्टी (राप्रपा) ३ लाख २३ हजार ९९ मतसहित छैटौँ स्थानमा रहेको छ ।
एक लाखभन्दा बढी मत प्राप्त गर्ने अन्य दलहरूमा जनता समाजवादी पार्टी नेपालले १ लाख ७० हजार १३१ मत र राष्ट्रिय परिवर्तन पार्टीले १ लाख ६५ हजार १०० मत प्राप्त गरेका छन् । यसैगरी जनमत पार्टीले ७५ हजार ७३५ मत, चकिया (जाँतो) चुनाव चिन्हबाट चुनाव लडेको गठबन्धनले ६० हजार ५५१ मत र नेपाल मजदुर किसान पार्टीले ४१ हजार ८९४ मत प्राप्त गरेका छन् ।
प्रणालीमा प्रविष्ट विवरणअनुसार राष्ट्र निर्माण दल नेपालले ३७ हजार ८६२ मत, राष्ट्रिय जनमोर्चाले २९ हजार २२६ मत, नेपाल जनता संरक्षण पार्टीले २६ हजार ९९४ मत प्राप्त गरेका छन् । साथै प्रगतिशील लोकतान्त्रिक पार्टीले २३ हजार ४७९ र नेपाल कम्युनिस्ट पार्टी माओवादीले २३ हजार २६४ मत प्राप्त गरेका छन् ।
