- १८ जेष्ठ २०८३, सोमबार / Jun 1, 2026
काठमाडौँ, १८ जेठ । काठमाडौँ महानगरपालिकाले सञ्चालन गरेको छात्रवृत्ति छनोट परीक्षामा १४ हजार ५७ जना विद्यार्थी उत्तीर्ण भएका छन्।
छात्रवृत्ति परीक्षा समितिका अनुसार हिजो सम्पन्न परीक्षामा सहभागी भएका २२ हजार परीक्षार्थीमध्ये न्यूनतम ४० अङ्क प्राप्त गर्ने विद्यार्थीहरूको प्रारम्भिक नतिजा सार्वजनिक गरिएको हो।
यो छात्रवृत्ति काठमाडौँ महानगरपालिका अन्तर्गत सञ्चालनमा रहेका संस्थागत शिक्षण संस्थामा शैक्षिक सत्र २०८३/०८४ का लागि कक्षा ११ र १२ मा अध्ययन गर्न चाहने विद्यार्थीहरूका लागि हो।
नतिजा सम्बन्धित पोर्टलमा अनलाइन फाराम भरेर रोल नम्बर, जन्ममिति र पासवर्ड प्रयोग गरी हेर्न, डाउनलोड गर्न र प्रिन्ट गर्न सकिने व्यवस्था गरिएको छ।
छात्रवृत्ति परीक्षा समितिका संयोजक तथा शिक्षा अधिकारी नमराज ढकालका अनुसार प्रारम्भिक नतिजाप्रति चित्त नबुझ्ने विद्यार्थीहरूका लागि पुनर्योग (Rechecking) को व्यवस्था गरिएको छ। पुनर्योगका लागि पर्सिसम्म आवेदन दिन सकिने पनि उहाँले जानकारी दिनुभयो।
