- १ कार्तिक २०८३, आईतवार / Oct 18, 2026
काठमाडौं, १४ असार । काठमाडौं उपत्यकामा बितेका २४ घण्टामा सवारी नियम उल्लङ्घन गरेको आरोपमा एक हजार ९२२ जना सवारीचालक ट्राफिक प्रहरीको कारबाहीमा परेका छन्।
काठमाडौं उपत्यका ट्राफिक प्रहरी कार्यालयका अनुसार उक्त कारबाहीबाट राज्यकोषमा पाँच लाख ११ हजार ५०१ रुपैयाँ राजस्व सङ्कलन भएको छ। कारबाहीमा पर्नेमा मादक पदार्थ सेवन (मापसे) गरेर सवारी चलाउने ९२ जना, नियमविपरीत राइड सेयरिङ गर्ने ७८ जना, ट्राफिक बत्ती उल्लङ्घन गर्ने १२९ जना तथा तीव्र गतिमा सवारी चलाउने १३९ जना रहेका छन्।
त्यसैगरी लेन अनुशासन उल्लङ्घन गर्ने ४१ जना, निषेधित क्षेत्रमा हर्न बजाउने ६७ जना, कालो सिसा प्रयोग गरेका १० जना, एकतर्फी सडकमा सवारी चलाउने ७० जना तथा अन्य विभिन्न ट्राफिक नियम उल्लङ्घन गर्ने एक हजार २९६ जनालाई पनि कारबाही गरिएको ट्राफिक प्रहरीले जनाएको छ।
ट्राफिक प्रहरीले सवारी चालकलाई सडक सुरक्षा र ट्राफिक नियमको पालना गर्न आग्रह गर्दै उल्लङ्घन गर्नेमाथि नियमित निगरानी र कारबाही जारी रहने जनाएको छ।
