- १० भाद्र २०८३, बुधबार / Aug 26, 2026
काठमाडौं, १४ असार । देशभर जारी वर्षा, पहिरो तथा सडक मर्मतका कारण विभिन्न मुख्य राजमार्गमा यातायात सेवा प्रभावित भएको छ। नेपाल प्रहरीको आज बिहान ९ बजेसम्मको विवरणअनुसार केही सडकखण्ड पूर्ण रूपमा बन्द भएका छन् भने केही स्थानमा एकतर्फी मात्र सवारी सञ्चालन भइरहेको छ।
मेची राजमार्ग अन्तर्गत इलाम नगरपालिका–९ राजदुवालीमा असार १३ गते खसेको पहिरोका कारण सडक पूर्ण रूपमा अवरुद्ध रहेको छ। मध्य पहाडी लोकमार्ग अन्तर्गत भोजपुर नगरपालिका–५ बोखिममा बाढीको असरका कारण सडक एकतर्फी सञ्चालनमा रहेको छ। सो क्षेत्रमा वैकल्पिक मार्गको व्यवस्था गरिएको प्रहरीले जनाएको छ।
बीपी राजमार्ग अन्तर्गत खुर्कोट–नेपालथोक–कटुन्जेबेंसी सडकखण्डमा सम्भावित बाढीको जोखिमलाई ध्यानमा राख्दै जेठ २२ गतेदेखि नै सबै प्रकारका सवारी साधन सञ्चालनमा रोक लगाइएको छ।
यस्तै, कुलेखानी–फाखेल–हुमाने–फर्पिङ–काठमाडौं सडकखण्ड सडक मर्मत कार्यका लागि पूर्ण रूपमा बन्द गरिएको छ। मर्मत सम्पन्न नहुन्जेल करिब एक महिनासम्म उक्त सडक बन्द रहने जनाइएको छ।
यसैगरी, मध्य पहाडी लोकमार्ग अन्तर्गत अछामको पञ्चदेवल विनायक नगरपालिका–४ पानीखोलामा आज पहिरो खसेपछि सडक पूर्ण रूपमा अवरुद्ध भएको छ।
नेपाल प्रहरीले वर्षायाममा यात्रा गर्दा सम्बन्धित सडकको पछिल्लो अवस्था बुझेर मात्र यात्रा गर्न तथा बाढी र पहिरोको जोखिम भएका क्षेत्रमा विशेष सतर्कता अपनाउन सर्वसाधारणलाई आग्रह गरेको छ।
