- २८ बैशाख २०८३, सोमबार / May 11, 2026
दाङ । मन्त्री छान्ने विषयमा किचलो बढ्दा लुम्बिनी प्रदेश सरकारले पूर्णता पाउन सकेको छैन । १२ मन्त्रालय रहेको लुम्बिनीमा मुख्यमन्त्रीसहित ९ जना मात्रै मन्त्री छन् । मुख्यमन्त्री बनेका चेतनारायण आचार्यसहित ९ मन्त्रीले शपथ लिएका थिए । सोही दिन कांग्रेसबाट मन्त्री बनेर सरकारमा नेतृत्व गर्न लागेका प्रमुख सचेतक जन्मजय तिमिलसिनालाई शपथपूर्व रोकिएपछि काँग्रेसमा किचलो बढेको हो ।
संस्थापन समूहमा रहेका तिमिलसिनालाई इतर समूहका प्रदेश अध्यक्ष अमरसिंह पुनसहितको नेतृत्वबाट तीव्र दवाव आएपछि रोकिएको थियो । त्यसपछि साउन १८ गते मन्त्रीले कार्यविभाजन पाउने र कांग्रेसबाट पुनः जन्मजयलाई सरकारमा पठाउने तयारी गरिए पनि उनलाई रोकिएको छ । पटक पटक आफ्नो नाम चर्चामा ल्याएर विवाद बढाउने र बन्न नदिनेहरू सक्रिय भएको प्रमुख सचेतक तिमिल्सिनाको गुनासो छ ।
उनले प्रमुख सचेतक पदबाट राजीनामा दिए । एमाले कांग्रेस गठबन्धन गर्दा नै मुख्यमन्त्रीसहित ५ मन्त्रालय एमाले र ५ मन्त्रालय कांग्रेसले पाउने र सरकारलाई पूर्णता दिने समझदारी भएको थियो । साना दलबीच पनि आकांक्षा बढेको छ । अहिलेको गठबन्धनमा रहेर सरकारमा जान जनमत, लोसपा, जसपा, जसपा नेपाल, नागरिक उन्मुक्ति सबै तयारी छन् तर मन्त्रालय जम्मा दुई वटा मात्रै छन् ।
कुरो नमिल्दा सबै मन्त्रीहरू बोकेर कांग्रेस दलका नेता डिल्ली चौधरी काठमाडौं आएका छन् । सरकारले पूर्णता नपाएसँगै तीन मन्त्रालयको जिम्मेवारी मुख्यमन्त्री चेतनारायण आचार्य आफैँले राखेका छन् । आन्तरिक मामिला तथा कानुन मन्त्रालय, सामाजिक विकास मन्त्रालय, महिला, बालबालिका तथा ज्येष्ठ नागरिक मन्त्रालय अहिले मुख्यमन्त्रीसँग छ ।
