- २२ भाद्र २०८३, सोमबार / Sep 7, 2026
मुख्य बुद्दा
किम जोङ वार्ताका लागि तयार, यदि अमेरिका आणविक हतियार त्याग्ने अडान छाड्छ
ट्रम्पसँगको भेटको सुखद सम्झना व्यक्त
दक्षिण कोरियाका नेता ली जे म्युङसँगको वार्ता प्रस्तावपछि प्रतिक्रिया
संयुक्त सैन्य अभ्यासको आलोचना, किम यो जोङले ‘लापरवाह’ पूर्वाभ्यास भने
प्योङयाङ, ६ असाेज । उत्तर कोरियाका नेता किम जोङ उनले अमेरिकाले आफ्नो आणविक हतियार त्याग्नुपर्ने अडान छाडेमा वार्ताका लागि तयार रहेको बताएका छन्।
किमले प्योङयाङमा भएको सर्वोच्च जनसभामा सम्बोधन गर्दै भने, “यदि अमेरिकाले हामीलाई निःशस्त्रीकरण गराउने आफ्नो निरर्थक जिद्दी छोडेर वास्तविकतालाई स्वीकार गर्छ र वास्तविक शान्तिपूर्ण सहअस्तित्व चाहन्छ भने हामी अमेरिकासँग वार्तामा बस्न नसक्ने कुनै कारण छैन।” यो जानकारी उत्तर कोरियाको आधिकारिक समाचार संस्था केसीएनएले दिएको हो।
किमले पूर्व अमेरिकी राष्ट्रपति डोनाल्ड ट्रम्पसँगको भेटघाटको सम्झना पनि व्यक्त गरेका छन्। उनले भने, “व्यक्तिगत रूपमा, मलाई अझै पनि अमेरिकी राष्ट्रपति ट्रम्पसँगको सुखद सम्झना छ।” किमको यो भनाइ ट्रम्प र दक्षिण कोरियाका नेता ली जे म्युङले गत महिना ह्वाइट हाउसमा उत्तर कोरियाली समकक्षीसँग भेट गर्न इच्छुक रहेको बताएका केही दिनपछि आएको हो। ट्रम्पले त्यस बेला भनेका थिए, “कुनै दिन म उनलाई भेट्नेछु। म उनलाई भेट्न आतुर छु।”
उत्तर कोरियाले अमेरिका र दक्षिण कोरियाबिचको संयुक्त सैन्य अभ्यासको आलोचना गर्दै आएको छ। किम जोङकी बहिनी किम यो जोङले यसलाई ‘लापरवाह’ आक्रमणको पूर्वाभ्यासको संज्ञा दिएकी छिन्।
