- १ कार्तिक २०८३, आईतवार / Oct 18, 2026
काठमाडौं । बागमती प्रदेशका नवनियुक्त स्वास्थ्यमन्त्री किरण थापाले बागमती प्रदेशभित्रका विपन्न क्यान्सरपीडितलाई स्वास्थ्य उपचारका लागि एक लाख रुपैयाँ सहुलियत प्रदान गर्ने निर्णय गरेका छन् । हेटौंडामा पदबहाली गर्दै मन्त्री थापाले उक्त निर्णय गरेका हुन् ।
मन्त्री थापाले भने, ‘विगतमा प्रदेश सरकारले विपन्न परिवारका क्यान्सरपीडितलाई ५० हजार सहयोग गर्दै आएको थियो । अबदेखि एक लाख रुपैयाँ दिने निर्णय गरेको छु ।’ उनले यसबापतको आर्थिक दायित्व भुक्तानीका लागि ११ करोड बजेट सुनिश्चित हुनुपर्ने र सो बजेट व्यवस्थाका लागि नियमानुसार मन्त्रिपरिषद्मा प्रस्ताव पेस गरिने बताए ।
त्यसैगरी, मानसिक एवं नसर्ने प्रकृतिका रोगको रोकथाम तथा न्यूनीकरणका लागि जिल्लास्तरीय समन्वय समिति गठन गर्ने निर्णय गरेको जानकारी दिए । स्वस्थ्यमन्त्री थापाले भने, ‘मेरो स्वास्थ्य मेरो जिम्मेवारी अभियानलाई अब बागमती प्रदेशका सबै पालिका तहमा पुर्याई जनचेतना अभिवृद्धि कार्यक्रम ल्याएर प्रदेशवासीको स्वास्थ्य सेवा पाउने अधिकार सुनिश्चित गरिनेछ ।’
