कोशीबाट बाहिरिँदै माओवादी

विराटनगर । कोशी प्रदेश सरकारबाट नेकपा माओवादी केन्द्र बाहिरिँदै छ । सम्भवतः आजै सरकारबाट बाहिरिने तयारी छ। केन्द्रमा सत्ता गठबन्धन परिवर्तन भए पनि माओवादीले भने एमाले नेता हिक्मतकुमार कार्की नेतृत्वको प्रदेश सरकार छाडेको थिएन ।

सरकार नछाडेको भनेर माओवादीको तीव्र आलोचना भइरहेको थियो । नेपाली कांग्रेस र एमालेलगायतका दल सम्मिलित गठबन्धन बनेपछि केन्द्रमा माओवादी प्रतिपक्षमा छ । तर, कोशीमा भने सरकार छाडेको छैन ।

केन्द्रीय गठबन्धन अनुसार सरकार निर्माण गर्नुपर्ने दबाब मुख्यमन्त्री कार्कीलाई छ । कार्की नेतृत्वको सरकारमा माओवादीबाट गणेश उप्रेती भौतिक पूर्वाधार विकास, राजेन्द्र कार्की स्वास्थ्य र नारायणबहादुर मगर पर्यटन, वन तथा वातावरणमन्त्री छन् ।

बन्दना झागड राज्यमन्त्री छन् । माओवादीका मन्त्रीहरु राजीनामा दिनलाई मुख्यमन्त्रीको समय पर्खिएर बसेका छन् । मुख्यमन्त्रीबाट समय पाउनेबित्तिकै राजीनामा दिएर सरकार छाड्ने माओवादीको तयारी छ ।