- २२ भाद्र २०८३, सोमबार / Sep 7, 2026
एजेन्सी, ९ असाेज । भारतको लद्दाखलाई पूर्ण राज्यको दर्जा दिने र संविधानको छैठौं अनुसूचीमा समावेश गर्ने मागसहित भइरहेको आन्दोलन हिजो हिंसात्मक बनेको छ।
लेहमा हजारौं प्रदर्शनकारीले र्याली निकाल्दा भारतीय जनता पार्टी (बीजेपी) को जिल्ला कार्यालयमा आगजनी गरिएको र प्रहरी तथा सुरक्षा निकायका गाडीमा तोडफोड भएको बीबीसी हिन्दीले उल्लेख गरेको छ। घटनापछि प्रशासनले लेहमा कर्फ्यु जारी गर्दै भारतीय दण्ड संहिता (बीएनएस) को धारा १६३ लागू गरेको छ।
यस अनुसार पाँच जना भन्दा बढी व्यक्तिको जमघटमा प्रतिबन्ध लगाइएको छ र कुनै पनि र्याली वा जुलुस निकाल्न पूर्व अनुमति अनिवार्य गरिएको छ। पर्यावरणविद् तथा सामाजिक अभियन्ता सोनम वांगचुक, जो १५ दिनदेखि आमरण अनशनमा थिए, हिंसा भएसँगै अनशन तोड्न बाध्य भएका छन्।
उनले भिडियो सन्देशमार्फत् तोडफोडप्रति दुःख व्यक्त गर्दै युवालाई संयमित रहन र शान्तिपूर्ण आन्दोलनको मार्ग अपनाउन आग्रह गरेका छन्। उनले यस आन्दोलनलाई ‘जेन जेडी क्रान्ति’ को नाम दिएका छन्। बीजेपी प्रदेश अध्यक्ष ताशी ग्यालसन खाचूले पार्टी कार्यालयमा आगो लगाइएको पुष्टि गरेका छन्।
यता, सुरक्षा निकायले स्थिति नियन्त्रणमा लिन अश्रुग्यास प्रहार र लाठीचार्ज गरेको थियो। विश्लेषकहरूले चीनसँग सीमा जोडिएको संवेदनशील क्षेत्रमा हिंसा हुनु भारत सरकारका लागि गम्भीर चेतावनी भएको टिप्पणी गरेका छन्।
