लागू औषध दुर्व्यसन चुनौती बन्दै

बाँके । भारतीय सीमासँग जोडिएका ठाउँमा लागू औषध दुर्व्यसन चुनौतीपूर्ण बन्दै गएको छ । लागू औषध प्रयोगकर्ता र कारोबार गर्नेको सङ्ख्या बढ्दै जाँदा न्यूनीकरण कार्य चुनौतीपूर्ण बन्दै गएको हो । हाल करिब १० हजार लागू औषध प्रयोगकर्ता रहेको लागु औषध उपचार तथा पुनः स्थापना केन्द्र महासंघका संयोजक रमेशकाजी महर्जनले बताए ।

जिल्लामा रहेका १० हजार प्रयोगकर्तामध्ये एक हजार पाँच सय महिला रहेका छन् । लागू औषध न्यूनीकरणका लागि २० वटा पुनः स्थापना केन्द्र रहेका छन् भने तीमध्ये दुई महिला पुनः स्थापना केन्द्र छन् । पछिल्लो पटक लागूपदार्थ प्रयोगको स्वरूपसमेत परिवर्तन भएकाले अवस्था थप चुनौतीपूर्ण बन्दै गएको लागू औषधविरुद्धका अभियन्ता अभिराज क्षेत्रीले बताए ।

विगतमा धुँवाका रूपमा प्रयोग हुने ब्राउन सुगर अहिले तरल बनाएर सुईको माध्यमबाट प्रयोग हुने गरेको पाइएको उनले जानकारी दिए । नेपालगञ्ज हुँदै लागूपदार्थ अफिम र चरेस भारततर्फ जाने र भारतबाट ब्राउन सुगरलगायत नार्कोटिक ड्रग नेपाल भित्रने गरेको भन्दै समस्या समाधानका लागि राजनीतिक दल र राज्यले थप प्रभाकारी कार्यक्रम अगाडि सार्नुपर्ने आवश्यकता औँल्याए ।