- २६ असार २०८३, शुक्रबार / Jul 10, 2026
लमजुङ, ४ जेठ । नेपाली कांग्रेसको भ्रातृ सङ्गठन नेपाल तरुण दल लमजुङको जिल्ला अधिवेशनको उद्घाटन सत्रमा भएको झडपमा खुकुरी प्रहार हुँदा चारजना घाइते भएका छन्।
लमजुङको बेँसीसहर नगरपालिका–८ स्थित प्रगतिटोल आमा समूह भवनमा शनिबार भएको पाँचौँ जिल्ला अधिवेशनको प्रारम्भिक सत्रमै विवाद चर्किएपछि हिंसात्मक झडप भएको हो।
घाइते हुनेहरूमा तरुण दलका क्षेत्रीय सभापति एवं बेँसीसहर–९ का वडाध्यक्ष खुसीजङ्ग गुरुङ, नेपाली कांग्रेस लमजुङका जिल्ला सदस्य किशोरजङ्ग बस्नेत, नेपाल विद्यार्थी सङ्घका केन्द्रीय सदस्य सुदीप अधिकारी र नेपाल तरुण दलका सदस्य धन घले रहेका छन्।
घटनाबारे जानकारी दिँदै जिल्ला प्रहरी कार्यालय लमजुङले चारै जना घाइते भएको पुष्टि गर्दै दुई जनाको अवस्था गम्भीर रहेकाले चितवन मेडिकल कलेज, भरतपुर पठाइएको जनाएकाे छ ।
अधिवेशनमा पूर्णकालीन सदस्यता, प्रतिनिधि चयन लगायतका विषयमा दुई समूहबीच विवाद चर्किएपछि हात हालाहाल भएको प्रहरीले जनाएकाे छ । विवाद क्रमशः उग्र बन्दै जाँदा खुकुरी निकालेर आक्रमण गरिएको बताइएको छ।
