दुई बालिकाको ज्यान लिने चितुवा नियन्त्रणमा

बर्दिया, २१ जेठ । गुलरिया नगरपालिका–५ बालापुरमा दुई बालिकाको ज्यान लिने र दुईलाई घाइते बनाउने मानव आक्रमणकारी चितुवा अन्ततः समातिएकाे छ । चितुवा राष्ट्रिय प्रकृति संरक्षण कोष, निकुञ्ज र डिभिजन वन कार्यालय बर्दियाको टोलीले पिँजडामा पारेर समातेको हो ।

७ वर्षीया सायरा चौधरी र ९ वर्षीया मेलिना खड्काको ज्यान गएको र अन्य दुई बालिका घाइते भएको घटनाले स्थानीयमा त्रास फैलिएको थियो। हात्ती र डार्ट गनको सहयोगमा खटिएको टोलीले एक साताको प्रयासपछि चितुवालाई नियन्त्रणमा लिन सफल भएको हो।

हाल चितुवालाई डिभिजन वन कार्यालय बर्दियामा राखिएको छ र यसलाई कहाँ सार्ने भन्ने विषयमा छलफल भइरहेको अधिकारीहरूले जनाएका छन्।