- २ बैशाख २०८३, बुधबार / Apr 15, 2026
दाङ । लुम्बिनी प्रदेश स्वास्थ्य मन्त्रालय मातहतका कार्यालय, अस्पताल तथा स्वास्थ्य संस्थाका सरकारी सवारी साधनको डिजिटल निगरानी गरिने भएको छ । चार पांग्रे सरकारी सवारी साधनमा जिपिएस जडान गरेर निगरानी गरिने भएको हो । सवारी साधनको विद्युतीय निगरानी गर्ने उद्देश्यले अनिवार्य रुपमा सवारी साधनमा जिपिएस जडान गर्ने निर्णय गरिएको र कार्यान्वयनमा ल्याउन मातहतका निकायमा परिपत्र गरिएको मन्त्रालयले जनाएको छ ।
स्वास्थ्य मन्त्री खेमबहादुर सारुले सेवा प्रवाहलाई प्रभावकारी र चुस्त बनाउन कार्यालय प्रमुखहरु तथा चिकित्सकहरु चढ्ने सवारी साधनमा जिपिएस जडान गरेर निगरानी गर्न थालिएको बताए । डिजिटल निगरानी गर्नुको मुख्य उद्देश्य सेवा प्रवाहसँग जोडिएको, कार्यालय प्रमुख, जिम्मेवार व्यक्ति नियमित कार्यालयमा रहने, पुरा समय बस्ने र सेवा प्रवाहलाई चुस्त बनाउनेसँग जोडिएको छ ।
लुम्बिनी प्रदेश स्वास्थ्य मन्त्रालयको आर्थिक बर्ष २०८०,०८१ को प्रादेशिक समिक्षा कार्यक्रममा जारी घोषणपत्रमा कार्यालयमा रहेका सरकारी सवारी साधनको विद्युतिय निगरानीको व्यवस्था मिलाउने उल्लेख थियो । त्यो घोषणपत्र कार्यान्वयन गर्न सरकारी साधनमा अनिवार्य जिपिएस जडान गर्न मातहतका निकायमा पत्राचार गरिएको स्वास्थ्य सचिव डा.बासुदेव उपाध्यायले बताए ।
