- २७ भाद्र २०८३, शनिबार / Sep 12, 2026
काभ्रे । बनेपा नगरपालिका–६ गोसाइँस्थानमा दुई विदेशी युवती लुटिएका छन् । लुटपाटको घटनामा संलग्न रहेको आधारमा तीन जनालाई प्रहरीले पक्राउ गरेको छ । धुलिखेल अस्पतालमा ‘इन्टर्नसीप’ गर्न आएका इटालियन नागरिक अन्दाजी २८ वर्षीया मार्टिन र जर्मनी नागरिक अन्दाजी २६ वर्षीया एलेक्स जेन्ड्रा लुटिएका हुन ।
चक्कु देखाएर दुई विदेशी नागरिकलाई लुटेको खुल्न आएको छ । लुट्नेमा नवलपरासीका हरि चौधरी, रामेछाप सुनापती गाउँपालिकाका सन्देश जैरु र पनौती नगरपालिका–९ सुन्थानका उज्ज्वल दाहाल छन् । लुटिएका सामानसहित उनीहरुलाई गए राति पक्राउ गरिएको प्रहरीले बताएको छ ।
ती दुई विदेशी युवतीलाई चक्कु देखाउँदै उनीहरुको साथमा रहेको आइफोन एकथान, स्मार्टवाच एकथान, डेबिड कार्ड एकथान, क्रेडिटकार्ड एकथान लुटेका थिए । विदेशी नागरिक लुटिएको खबर प्राप्त हुनासाथ बनेपास्थित इलाका प्रहरी कार्यालयबाट प्रहरी टोली परिचालन भएको थियो । परिचालन भएको केही समय भित्रै उनीहरूलाई नियन्त्रणमा लिएर अहिले थप अनुसन्धान जारी राखेको छ ।
