कस्तो छ गायिका मधु क्षेत्रीको स्वास्थ्य अवस्था?

काठमाडौं । श्रीमान्‌बाटै घरेलु हिंसामा परेकी गायिका मधु क्षेत्रीको स्वास्थ्य अवस्था निकै कमजोर रहेको राष्ट्रिय लोक तथा दोहोरीगीत प्रतिष्ठान नेपालले जनाएको छ ।

प्रतिष्ठानले आफ्नो अस्ट्रेलिया शाखामार्फत मधुको जानकारी लिएको थियो । तुलनात्मक रूपमा भने स्वास्थ्य अवस्थामा केही सुधार भएको प्रतिष्ठानकी अध्यक्ष रीता थापाले जानकारी दिइन् । शारीरिक र मानसिक हिंसाका कारण कमजोर बनेकाले पुरानै अवस्थामा फर्किन केही समय लाग्ने अध्यक्ष थापाको भनाइ छ । प्रहरीले नै उद्धार गरेर उपचारका लागि लगेकाले कानुनी प्रक्रिया पनि प्रहरीले अगाडि बढाउने बताइएको छ ।

मधुले सामाजिक सञ्जालमार्फत आफू घरेलु हिंसाबाट पीडित भएको सार्वजनिक गरेकी थिइन् । त्यसपछि अस्ट्रेलिया सरकारले नै उनलाई उद्धार गरेर उपचारका लागि अस्पताल लगेको थियो । उनले आफूलाई श्रीमान्‌ले कुटपिट गर्नुका साथै यातना दिने गरेको बताएकी थिइन् ।