- २ श्रावण २०८३, शनिबार / Jul 18, 2026
काठमाडौं । आगामी २, ३ र ४ फागुनमा काठमाडौंमा हुने अनेरास्ववियुको २३औँ राष्ट्रिय महाधिवेशनमा माउ पार्टी एमालेले गुट र प्यानल बनाएर प्रतिस्पर्धा गर्न निषेध गरेको छ । स्वस्थ प्रतिस्पर्धाको वातावरण बनाउन यस्तो गरिएको एमालेको भनाइ छ । यसअघिका महाधिवेशनमा नेतानिकटका प्यानल बनाएर विद्यार्थी चुनावी मैदानमा उत्रिने गरेका थिए ।
एमाले केन्द्रीय सदस्य तथा अनेरास्ववियु इन्चार्ज माधव ढुंगेलले यतिवेला पार्टीमा फरक धार नभएकाले अनावश्यक गुटबन्दी गरेर समय खेर फाल्न नहुने बताए । विद्यार्थी संगठनका मुद्दामा एकीकृत गर्ने, विद्यार्थीका पक्षमा काम गर्ने गरी तयार हुनुपर्ने उनको भनाइ छ । एउटा पदमा जतिजनाले पनि प्रतिस्पर्धा भने गर्न सक्ने ढुंगेलले बताए ।
विद्यार्थीबीच लोकप्रियले चुनाव जितेर संगठनको नेतृत्व गर्ने र जसले विजय प्राप्त गर्न सक्दैन वा प्रतिस्पर्धामा सहभागी नभई बिदाइ हुनेलाई पार्टीले राम्रोसँग व्यवस्थापन गर्ने उनको भनाइ छ ।
आगामी महाधिवेशनबाट अनेरास्ववियुको कार्यसमिति सानो हुँदै छ । यसअघि भएको विधान अधिवेशनले कार्यसमिति १९९ सदस्यीय हुने व्यवस्था गरेको छ । अहिले ५१७ जनाको कार्यसमिति छ । अब एक अध्यक्ष, चार उपाध्यक्ष, एक महासचिव, १० सचिव, एक कोषाध्यक्षसहित १९९ जनाको कार्यसमिति रहनेछ ।
माधव ढुंगेल, अनेरास्ववियु इन्चार्ज
हिजो पार्टीभित्रै दुई लाइन संघर्ष थियो, त्यसको प्रभाव जनवर्गीय संगठनमा पनि देखिएको थियो । अहिले पार्टीमा फरक धार छैन, अनावश्यक गुटबन्दी गरेर समय खेर फाल्न हुँदैन । गुट र प्यानलले कसैलाई फाइदा हुँदैन ।
अधिकांश प्रतिनिधि टुंगियो, केहीमा विवाद
२३औँ महाधिवेशनमा १५ सय ७९ प्रतिनिधि आउँदै छन् । जसमध्ये अहिलेसम्म १५ सय ५० को हाराहारीमा प्रतिनिधिको टुंगो लागेको इन्चार्ज माधव ढुंगेलले बताए । केही ठाउँमा प्रतिनिधि छनोटमा विवाद छ ।
को–को छन् दाबेदार ?
अध्यक्षका लागि वर्तमान वरिष्ठ उपाध्यक्ष आरसी लामिछाने र महासचिव समिक बडाल मुख्य प्रतिस्पर्धामा छन् । यद्यपि, उपाध्यक्षहरू झपिन्द्र खत्री, लोकेश निरौला र मोती विक, उमेश आचार्यलगायतको पनि चर्चा छ । महासचिवका दाबेदारको संख्या ठूलो छ । अहिलेका चार उपमहासचिव र केही सचिवले पनि महासचिवमा दाबी गरेका छन् । अहिलेका केही उपाध्यक्ष पनि महासचिव पाउने अवस्थामा उम्मेदवारी दिने तयारीमा छन् । नयाँ पत्रिका दैनिकबाट…..
